శోభకృతూ శుభం శుభం

మరులు గొలిపే మనోహరంగా

చిగురించిన నవవసంతం

అందాల ఆమని కాగా,

పులకరించి పరవశించిన

గండుకోయిల రాగాల సందున

చీకటి దారులు విడిచి,

చైత్రమాస తొలి ఉషస్సువై,

నవనవోన్మేషాల ప్రకృతి శోభవై,

దశదిశలా వేవేల వర్ణాలతో

సర్వాలంకార సుశోభితవై

నండూరి ఎంకివై,

అణువణువూ పరిమళించు పరిమళాలతో

ఉజ్వలిస్తూ, ఉద్యమిస్తూ, ఊపిర్లూదుతూ

ఆశల పల్లకీలో ఊరేగుతూ,

వాసంతకన్య అనుబంధాల

కౌగిలింతల ముడివేయగా

ఉత్సాహ సమీరాల్ని వెంటతెస్తూ,

అవనికంతా ఆది పర్వదినాన

తెలుగు ముంగిళ్ళలోకి తొలిచుట్టమై,

సంబరాల వసంతాల మురిపాల తేలే

నవవత్సరమై,

తెలుగు జాతి కీర్తి ప్రభ వెలయగాను,

ఎల్లరకూ శాంతి సమైక్యతా

సమరసతలను పంచగాను,

విచ్చేస్తున్న ఓ శోభకృతూ !

నీ ఆగమనమే మాకు హరిచందనం,

నీ రాకతో పుడమంతా విరి నందనం.

నీ రాక కలిగించు శుభము శుభము,

నీకు జయము జయము.

వేమూరి శ్రీనివాస్

99121 28967