శ్రీశైలం డ్యాం చూడడానికి వెళుతూ అనంత లోకాలకు..

దిశ, యాచారం : కారు బోల్తా పడటంతో ఇద్దరు యువకులు మృతి చెందిన సంఘటన, హైదరాబాద్ గ్రీన్ ఫార్మా సిటీ పోలీస్ స్టేషన్ పరిధిలో ఆదివారం తెల్లవారుజామున 3 గంటల సమయంలో చోటుచేసుకుంది. సీఐ లిక్కి కృష్ణంరాజు, తెలిపిన వివరాల ప్రకారం పహాడీషరీఫ్ చెందిన ఇంతియాజ్ ఖాన్ (18), నాయబ్ (18) లు స్నేహితులతో కలిసి మెహిందీపట్నం లోని ఒక ట్రావెల్స్ లో కారును అద్దెకు తీసుకున్నారు.

అందులో శ్రీశైలం డ్యాం చూడడానికి వెళ్తుండగా మార్గమధ్యంలో శ్రీశైలం హైవే ముచ్చర్ల గేటు వద్దకు చేరుకోగానే కారు అదుపుతప్పి బోల్తా పడింది. ఈ ప్రమాదంలో ఇద్దరు యువకులకు తీవ్ర గాయాలు కావడంతో ప్రభుత్వ ఆసుపత్రికి తరలిస్తుండగా మార్గమధ్యంలో మృతి చెందారు. కారు నడుపుతున్న అబ్దుల్ సమీర్, మరో ఐదుగురు స్వల్పంగా గాయపడ్డారు. ఈ మేరకు కేసు నమోదు చేసుకొని దర్యాప్తు చేస్తున్నట్లు పోలీసులు తెలిపారు.