పిడుగుపాటుకు రెండు ఎద్దులు మృతి...

దిశ, ఉప్పునుంతల: పిడుగుపాటుకు రెండు ఎద్దులు మృతి చెందిన సంఘటన ఉప్పునుంతల మండల పరిధిలో గురువారం జరిగింది. వివరాలు ఇలా ఉన్నాయి. గురువారం ఉప్పునుంతల మండలంలోని తిరుమలపూర్, జప్తి సదగోడు, తాడూర్, ఉప్పునుంతల, మర్రిపల్లి గ్రామాల్లో బలమైన ఈదురు గాలులతో కూడిన భారీ వర్షం కురిసింది. బింపాకుల బలస్వామి అనే రైతుకు చెందిన రెండు ఎద్దులు పిడుగు పడి మృతి చెందాయి.

వాటి విలువ లక్ష రూపాయలు ఉంటుందని రైతు వాపోయాడు. ఇది ఇలా ఉండగా తిరుమలపూర్ గ్రామంలో విద్యుత్ స్తంభాలు విరిగిపడ్డాయి. పెద్ద పెద్ద చెట్లు నేలకూలాయి. జప్తి సదగోడు గ్రామములో కోతకు సిద్ధంగా ఉన్న వరి పైరు నేలకొరిగింది. అకాల వర్షం వల్ల అపార నష్టం వాటిల్లిందని రైతులు ఆవేదన వ్యక్తం చేశారు. నష్టపోయిన రైతులను ప్రభుత్వం ఆదుకోవాలని కోరారు.