KBR Park పోర్షే కారు యాక్సిడెంట్ కేసును ఛేదించిన పోలీసులు
దిశ, సిటీక్రైం: కేబీఆర్ పార్క్ (KBR Park) ప్రహారిని ఢీకొట్టిన పోర్చే (Porche) కార్ యాక్సిడెంట్ కేసులో స్టాండప్ కమెడియన్, వ్యాపారీ ఉత్సవ్ దిక్షిత్‌ను బంజారాహిల్స్ పోలీసులు అరెస్టు చేసినట్లు ఆదివారం ఓ ప్రకటనలో తెలిపారు. ఈ నెల 1వ తేదీ శుక్రవారం తెలవారుజామున 5:45 గంటల సమయంలో అతివేగంగా వెళుతున్న ఓ విదేశీ మోడల్ పోర్షే కారు అదుపు తప్పి కేబీఆర్ పార్క్ ప్రహారీ, గ్రిల్, పుట్‌పాత్‌లను ఢీకొట్టింది. దీంతో ఇదంతా చూసిన ఓ వ్యక్తి డయల్ 100కు ఫిర్యాదు చేయడంతో బంజారాహిల్స్ పోలీసులు సుమోటోగా కేసు నమోదు చేసి దర్యాప్తు ప్రారంభించారు. ఘటనా స్థలంలో దొరికిన విరిగిపోయిన నెంబరు ప్లేట్‌తో దర్యాప్తు ప్రారంభించిన పోలీసులు.. కారును గుర్తించి.. ఆరా తీయగా అది ఉత్సవ్ దీక్షిత్‌‌దేనని తేలింది. అంతేకాకుండా యాక్సిడెంట్ సమయంలో ఆయనే స్వయంగా కారు నడుపుతూ యాక్సిడెంట్ చేశాడని ప్రాథమిక విచారణలో తేలింది. దీంతో ఉత్సవ్ దీక్షిత్‌ను అదుపులోకి తీసుకున్న పోలీసులు.. అతనికి డ్రగ్స్ టెస్టు, డ్రంకెన్ డ్రైవ్ టెస్టులు నిర్వహించారు. అతని డ్రైవింగ్ లైసెన్స్‌ను రద్దు చేయాలని ఆర్‌టీఓ అధికారులకు పోలీసులు సిఫార్సు చేశారు.
