హోటల్ లో పేలిన సిలిండర్లు.. తప్పిన ప్రాణాపాయం..
దిశ, శేరిలింగంపల్లి : హోటల్ లో వంట చేస్తుండగా గ్యాస్ సిలిండర్లు పేలిపోయిన ఘటన మాదాపూర్ పోలీసు స్టేషన్ పరిధిలో చోటుచేసుకుంది. మాదాపూర్ సాయినగర్ కాలనీలోని మెయిన్ రోడ్డులో గల ఓ గుడిసె హోటల్ లో వంట చేస్తుండగా ఒక్కసారిగా రెండు సిలిండర్లు పేలి పోవడంతో తీవ్రమంటలు చెలరేగాయి. ఒక్కసారిగా మంటలు చెలరేగడంతో అందులో పనిచేస్తున్న సిబ్బంది అక్కడి నుండి పరుగులు తీశారు. ఒక్కసారిగా రెండు సిలిండర్లు పేలడంతో పక్క హోటల్ కు కూడా మంటలు అంటుకుని వంట సామాగ్రి, ఎలక్ట్రానిక్ వస్తువులు పూర్తిగా దగ్ధం అయ్యాయి. మెయిన్ రోడ్డుకు అనుకునే ఈ ప్రమాదం జరగడంతో స్థానికులు, చుట్టుపక్కల వారు భయబ్రాంతులకు గురయ్యారు.
అయితే ఈ ఘటనకు సంబంధించి భాదితులు మనోజ్ కుమార్, సూర్యనారాయణ, ఫైర్ సేఫ్టీ అధికారి అబ్దుల్ ఫజల్ తెలిపిన వివరాల ప్రకారం ఝార్ఖండ్ రాష్ట్రానికి చెందిన మనోజ్ నగరానికి వలసవచ్చి మాదాపూర్ సాయినగర్ కాలనీలో ఉంటూ హోటల్ నడుపుతున్నారు. అయితే ఎప్పటిలాగే సోమవారం ఉదయం టిఫిన్ సెంటర్ నడిపించిన వారు హోటల్ కట్టేసి ఇంటికి వెళుతున్న సమయంలో పక్కనే ఉన్న కరెంట్ పోల్ కు అమర్చిన మీటర్ నుండి మంటలు చెలరేగి గుడిసెకు అంటుకున్నాయి. దీంతో వేగంగా వ్యాపించిన మంటలతో రెండు గ్యాస్ సిలిండర్లు పేలిపోయాయి. అలాగే ఎలక్ట్రానిక్ వస్తువులు, వంట సామాగ్రి పూర్తిగా దగ్ధం అయ్యాయి. ఘటన జరిగిన సమయంలో హోటల్ లో ఎవరూ లేకపోవడంతో పెను ప్రమాదం తప్పింది. స్థానికుల సమాచారంతో ఘటనా స్థలానికి చేరుకున్న ఫైర్ సేఫ్టీ సిబ్బంది మంటలను ఆర్పివేశారు.
