మహిళపై ఎలుగుబంటి దాడి

దిశ, హుజురాబాద్ రూరల్ : మండలంలోని కాట్రపల్లి గ్రామానికి చెందిన గంగాధర వనమాల (50) అనే మహిళపై ఎలుగుబంటి దాడి చేసి తీవ్రంగా గాయపరిచింది. బాధితురాలు కథనం మేరకు తన చేనులో పత్తి ఏరుతుండగా పక్కనే మొక్కజొన్న చేనులో ఎలుగుబంటి ఉంది. ఈమెను చూసిన ఎలుగుబంటి అకస్మాత్తుగా దాడి చేసింది.

ఈ దాడిలో తలకు, చేతులకు తీవ్ర గాయాలయ్యాయి. స్థానికులు ఆమె అరుపులు విని ఆ ప్రాంతానికి వెళ్లి డప్పు చప్పుళ్లతో, టపాకాయల చప్పులతో ఎలుగుబంటిని ఆ ప్రాంతం నుంచి తరిమివేశారు. తీవ్రంగా గాయపడ్డ వనమాలను హుజురాబాద్ ప్రభుత్వ ఆసుపత్రికి తరలించి చికిత్స అందించారు. అనంతరం మెరుగైన వైద్యం కోసం జమ్మికుంట లోని ఓ ప్రైవేటు ఆసుపత్రికి తరలించారు.