గంజాయి స్మగ్లర్లకు దేహశుద్ధి

దిశ, భద్రాచలం : భద్రాచలం సమీపంలోని ఎటపాకలో పోలీసులు వాహన తనిఖీ చేస్తుండగా ఒక కారు అనుమానాస్పదంగా కనపడటంతో పోలీసులు ఆపడానికి ప్రయత్నించారు. పోలీసులను చూసి కంగారు పడిన కారులో ఉన్న వ్యక్తులు కారు వేగం పెంచి రోడ్డుపై ఉన్న వారిని ఢీకొట్టే ప్రయత్నం చేశారు. ఈ క్రమంలో మేకల గుంపు పైకి కారు వెళ్లడంతో రెండు మేకలు అక్కడికక్కడే మృతి చెందాయి.

దాంతో భయంతో కారును మరింత వేగం పెంచి రోడ్డు పక్కనే ఉన్న విద్యుత్ పోల్ ను ఢీకొని కారు ఆగిపోవడంతో అందులో ఉన్న వ్యక్తులు పారిపోయే ప్రయత్నం చేశారు. దీంతో ఆగ్రహించిన ప్రజలు వారిని పట్టుకొని దేహశుద్ధి చేసి పోలీసులకు అప్పజెప్పారు. అనంతరం కారును తనిఖీ చేయగా గంజాయి లభించింది. దీంతో పోలీసులు కారును పోలీస్టేషన్ కు తరలించి గంజాయి అక్రమంగా రవాణా చేస్తున్న వారిపై కేసు నమోదు చేశారు.