రైలు ఎక్కుతుండగా జారిపడి యువతి మృతి

దిశ, కోరుట్ల టౌన్ : వరంగల్ రైల్వే స్టేషన్లో రైలు ఎక్కుతుండగా ప్రమాదవశాత్తు జారిపడిన ఘటనలో కోరుట్లకు చెందిన సామల్ల ఉదయశ్రీ (20) అనే యువతి మృతి చెందినట్లు ఆమె బంధువులు తెలిపారు. వారు తెలిపిన వివరాల ప్రకారం కోరుట్లలోని ప్రకాశం రోడ్ కు చెందిన సామల్ల గణేష్ - నీరజ దంపతులు తమ ఏకైక కూతురు సామల్ల ఉదయశ్రీతో కలిసి తీర్థ యాత్రల కోసం సోమవారం ఇంటి నుంచి బయలు దేరారు.

అదే రోజున వరంగల్ స్టేషన్లో ఉదయశ్రీ రైలు ఎక్కుతుండగా జారిపడి తీవ్రంగా గాయపడడంతో అక్కడున్న సిబ్బంది వెంటనే మహాత్మ గాంధీ ఆసుపత్రికి తరలించి చికిత్స అందించారు. చికిత్స పొందుతూ బుధవారం ఉదయం మరణించినట్లు తెలిపారు. ఉదయశ్రీ మరణంతో కోరుట్లలో విషాద ఛాయలు అలుముకున్నాయి. ఉదయశ్రీ సోదరుడు కూడా 8 సంవత్సరాల క్రితం మరణించినట్లు తెలిసింది. నాడు కుమారుడు, నేడు కూతురు మరణంతో ఆ తల్లిదండ్రులు తీరని దు:ఖంలో మునిగిపోయారు.