suicide : ఆర్థిక ఇబ్బందులతో చెరువులో దూకి వ్యక్తి ఆత్మహత్య
దిశ,దుబ్బాక : ఆర్థిక ఇబ్బందులతో చెరువులో దూకి వ్యక్తి ఆత్మహత్య చేసుకున్న ఘటన సిద్దిపేట జిల్లా అక్బర్ పేట, భూంపల్లి మండలం పోతారెడ్డిపేట గ్రామంలో చోటుచేసుకుంది. అక్బర్ పేట భూంపల్లి ఎస్సై హరీష్ తెలిపిన వివరాల ప్రకారం… పోతారెడ్డిపేట గ్రామానికి చెందిన తుమ్మల దేవదాస్(59) గత కొంత కాలంగా ఆర్థిక ఇబ్బందులతో బాధపడుతున్నాడు. తీవ్రంగా వేధిస్తోన్న ఆర్థిక ఇబ్బందులను దృష్టిలో పెట్టుకుని దేవదాస్ పలుమార్లు తన భార్యతో బతకాలని లేదని, చనిపోవాలని ఉందని తరచుగా బాధపడేవాడని తెలిసింది. దేవదాస్ శుక్రవారం ఉదయం స్థానిక పెద్ద చెరువు గట్టు పైకి వెళ్లిన విషయాన్ని ఆయన కుటుంబ సభ్యులకు స్థానికులు సమాచారం అందించారు. కుటుంబ సభ్యులు చెరువు గట్టుపైకి వెళ్లేలోపు దేవదాస్ చెరువులోకి దూకి ఆత్మహత్య చేసుకున్నాడు. స్థానికుల సహాయంతో కుటుంబ సభ్యులు దేవదాస్ మృతదేహాన్ని బయటకు తీశారు. భూంపల్లి ఎస్ఐ హరీష్ కేసు నమోదు చేసుకుని దర్యాప్తు చేస్తున్నారు.
