తాటి చెట్టుపై నుంచి పడి వ్యక్తి మృతి

దిశ, అబ్దుల్లాపూర్మెట్: తాడిచెట్టు పై నుంచి ప్రమాదవశాత్తు కింద పడి ఒక వ్యక్తి మృతి చెందిన సంఘటన సోమవారం అబ్దుల్లాపూర్మెట్ పోలీస్ స్టేషన్ బాచారం పరిధిలో చోటుచేసుకుంది. పోలీసులు తెలిపిన కథనం ప్రకారం… అబ్బగోని శంకరయ్య గౌడ్ (60) సోమవారం ఉదయం తాటి చెట్టు ఎక్కేందుకు బయలుదేరారు. అదే విధంగా కుటుంబ సభ్యులు కూడా ఇతర పనుల నిమిత్తం బయటకు వెళ్లారు. తిరిగి సాయంత్రం కుటుంబ సభ్యులు వచ్చేవరకు ఇంటి వద్ద లేకపోవడంతో పలుమార్లు ఫోన్ చేశారు. అప్పటికి సరైన స్పందన రాకపోవడంతో గ్రామ శివారులో కుటుంబ సభ్యులతో కలిసి వెతికారు. సాయంత్రం బాచారం శివారులోని దొడ్డి చెట్టు కింద తీవ్ర గాయాలతో పడి ఉండడాన్ని గమనించారు. ఈ విషయాన్ని 100కు డయల్ చేసి పోలీసులకు వివరించడంతో పోలీసులు వచ్చి పరిశీలించగా అప్పటికే మృతి చెందినట్లు గుర్తించారు. మృతదేహాన్ని పోస్ట్ మార్టం నిమిత్తం ఉస్మానియా ఆస్పత్రికి తరలించి కేసు నమోదు చేసుకుని దర్యాప్తు చేస్తున్నారు.