గేదెను ఢీకొన్న బైక్…వ్యక్తి మృతి

దిశ, చేగుంట: రాత్రివేళ బైక్ పై వస్తున్న క్రమంలో ఎదురుగా వస్తున్న గేదెను ఢీకొనడంతో వ్యక్తి మృతి చెందిన సంఘటన మండల పరిధిలోని బోనాల గ్రామ శివారులో సోమవారం రాత్రి చోటుచేసుకుంది. చేగుంట ఎస్సై చైతన్య కుమార్ రెడ్డి తెలిపిన వివరాల ప్రకారం.. దౌల్తాబాద్ మండలం పోసాని పల్లి గ్రామానికి చెందిన అబ్రమైన నాగులు( 56 ) వ్యవసాయం చేసుకుంటూ జీవనం సాగిస్తున్నాడు. తమ సమీప బంధువు మృతి చెందగా అంత్యక్రియల నిమిత్తం శివాయిపల్లి గ్రామానికి అన్న కుమారుడు అబ్రమైన మల్లేశంతో కలిసి వెళ్లారు. తిరిగి వస్తున్న క్రమంలో చేగుంట మండల పరిధిలోని బోనాల గ్రామ శివారులో ఎదురుగా వస్తున్న గేదెను ఢీకొనడంతో బైక్ వెనుక కూర్చున్న నాగులు, కిందపడి తలకు తీవ్ర గాయాలై మృతి చెందాడు. మృతుడు నాగులు భార్య యాదవ్వ ఫిర్యాదు మేరకు చేగుంట ఎస్సై చైతన్య కుమార్ రెడ్డి కేసు నమోదు చేసుకుని దర్యాప్తు చేస్తున్నారు.