హోటల్ - టూరిజం రంగాల్లో అన్ని లక్షల ఉద్యోగాలా..

దిశ, ఫీచర్స్ : అయోధ్యలో శ్రీరామ జన్మభూమి ఆలయాన్ని నిర్మించినప్పటి నుంచి యాత్రికుల సంఖ్య ఏ మాత్రం తగ్గడం లేదు. ఇంతకు ముందు ఉజ్జయినిలోని మహాకాల్ లోక్, బనారస్‌లోని కాశీ విశ్వనాథ్ కారిడార్ ఈ నగరాల్లో పర్యాటకం, హోటల్ పరిశ్రమను పునరుద్ధరించాయి. కోవిడ్ సమయంలో ఈ రంగం అత్యంత క్లిష్ట పరిస్థితిని ఎదుర్కోవలసి వచ్చింది. ప్రస్తుతం క్రమంగా మెరుగుపడుతోంది.

కాలం గడుస్తున్నా కొద్ది కోవిడ్ ప్రభావం హోటల్, పర్యాటక రంగంలో కనుమరుగవుతోంది. ఈ రంగాల్లో మళ్లీ ఎంతో మందికి ఉపాధి కల్పించనున్నారు. రానున్న 12 నుంచి 18 నెలల్లో ఈ రంగంలో 2 లక్షల వరకు ఉద్యోగాలు వచ్చే అవకాశాలు ఉన్నాయంటున్నారు నిపుణులు.

హోటళ్ల విస్తరన..

ఇటీవల, అయోధ్య ఉత్తర ప్రదేశ్‌లో అతిపెద్ద కొత్త పర్యాటక కేంద్రంగా ఉద్భవించింది. అందువల్ల అనేక హోటళ్లు ఇక్కడ విస్తరించాయి. ఐటీసీ నుంచి లెమన్ ట్రీ, టాటా గ్రూపునకు చెందిన తాజ్ హోటల్ వరకు ఇక్కడ పెట్టుబడులు పెడుతున్నారు. దాంతో ఇక్కడ హోటల్ కార్యకలాపాల్లో ఉద్యోగాలు పెరిగే అవకాశాలు ఉన్నాయి. ఇది అయోధ్యలోనే కాదు దేశంలోని వివిధ ప్రాంతాల పరిస్థితి.

ఇందులో మధ్యప్రదేశ్‌లోని ఉజ్జయిని నుండి ఉత్తరాఖండ్ వరకు చార్ధామ్ యాత్ర కూడా ఉంది. గత కొన్నేళ్లుగా ఈ ప్రాంతాలన్నింటికీ ప్రయాణం పెరిగింది. దీనివల్ల హోటల్, టూరిజం రంగంలో ఉద్యోగాలు పెరుగుతున్నాయి.

2 లక్షల ఉద్యోగాలు..

స్టాఫింగ్ సర్వీస్ కంపెనీ టీమ్‌లీజ్ సర్వీసెస్ నివేదిక ప్రకారం వచ్చే 12 నుంచి 18 నెలల్లో హోటల్, రెస్టారెంట్, టూరిజం రంగాల్లో 2 లక్షలకు పైగా ఉద్యోగాలు వస్తాయని అంచనా వేసింది. ఇందులో కూడా దాదాపు 1 లక్ష ఉద్యోగాలు హోటల్ పరిశ్రమలో మాత్రమే ఉండనున్నాయి.

హోటల్ పరిశ్రమ శ్రామిక శక్తిని పెంచుతోందని నివేదికలు చెబుతున్నాయి. హోటల్ కంపెనీలు కొత్త మార్కెట్లలోకి ప్రవేశిస్తున్నాయి. దీని కారణంగా హోటల్ గదుల సంఖ్య పెరుగుతోంది. దీంతో ఈ రంగంలో ఉద్యోగాలు పెరుగుతున్నాయి.

2 నెలలు పీక్ సీజన్..

భారతదేశంలో, మే నుండి జూలై ప్రారంభం వరకు దాదాపు రెండు నెలలు పాఠశాల - కాలేజీలకు సెలవులు ఉంటాయి. అలాంటి సమయంలో కుటుంబంతో సహా ప్రయాణాలను చాలా మంది చేస్తుంటారు. అందుకే దీన్ని పర్యాటక రంగంలో పీక్ సీజన్ అంటారు. ఈ కాలంలో డిమాండ్ బాగా పెరుగుతుంది. ఈ కాలంలో ఉద్యోగార్థుల సంఖ్యలో 20 నుంచి 30 శాతం వృద్ధి నమోదైంది.