Tyre production: సహజ రబ్బరు కొరత కారణంగా తగ్గిన టైర్ల ఉత్పత్తి
దిశ, బిజినెస్ బ్యూరో: దేశంలో సహజంగా లభించే రబ్బరు కొరత కారణంగా భారతదేశంలోని కొన్ని టైర్ ప్లాంట్లలో జులై నెలలో ఉత్పత్తి 10 శాతం క్షీణించిందని ఆటోమోటివ్ టైర్ మ్యానుఫ్యాక్చరర్స్ అసోసియేషన్ గురువారం తెలిపింది. ప్రస్తుత ఆర్థిక సంవత్సరంలో దేశీయ సహజ రబ్బరు (NR) లభ్యత చాలా వరకు తగ్గిపోయింది. జూన్ 2024లో 60,000 టన్నుల సహజ రబ్బరు ఉత్పత్తి వస్తుందని అంచనా వేశారు. అయితే దీనికి వ్యతిరేకంగా వాస్తవ లభ్యత కేవలం 30,000 టన్నులుగా నమోదైందని అసోసియేషన్ ఒక ప్రకటనలో తెలిపింది. దీంతో దేశంలో టైర్ల తయారీ ప్లాంట్లు చాలా వరకు తమ ఉత్పత్తిని తగ్గించాల్సి వచ్చింది.
ATMA డైరెక్టర్ జనరల్ రాజీవ్ బుధ్రాజా మాట్లాడుతూ, టైర్ల పరిశ్రమ నిరంతరం తన ఉత్పత్తిని కొనసాగించడానికి సహజ రబ్బరు కోసం దిగుమతులపై ఆధారపడాల్సి వస్తుంది. దేశీయ లోటులను కవర్ చేస్తూ, స్థానికంగా ఉన్న ప్లాంట్లలో తయారీని పెంచుతున్నాము. రెండు ఓడరేవులకు పరిమితం చేయబడిన దిగుమతి చేసుకున్న రబ్బరు కార్యకలాపాలను నిర్వహించడం సమస్యగా ఉంది. ఈ లాజిస్టికల్ సమస్య, సహజ రబ్బరులో ఊహించిన దేశీయ లోటులతో పాటు, పెరుగుతున్న డిమాండ్‌ను తీర్చడానికి భారీగా పెట్టుబడి పెట్టే పరిశ్రమకు ఇబ్బంది కలిగిస్తోందని రాజీవ్ బుధ్రాజా అన్నారు.
