ఇండిపెండెన్స్‌డే సందర్భంగా జియో రూ. 2,999 కొత్త రీఛార్జ్ ప్లాన్!
ముంబై: దేశ స్వాతంత్య్ర దినోత్సవం సందర్భంగా దేశీయ దిగ్గజ టెలికాం సంస్థ రిలయన్స్ జియో వినియోగదారుల కోసం సరికొత్త ప్రీ-పెయిడ్ ప్లాన్‌ను తీసుకొచ్చింది. ఏడాదికి రూ. 2,999తో రీఛార్జ్ చేస్తే రోజుకు 2.5జీబీ డేటాతో పాటు అపరిమిత కాల్స్, ఎస్ఎంఎస్ ప్రయోజనాలు లభించే ప్లాన్‌ను ప్రకటించింది. వాటితో పాటు అనేక అదనపు ప్రయోజనాలు కూడా ఉన్నాయని కంపెనీ ఓ ప్రకటనలో తెలిపింది.
కాలింగ్, డేటాతో పాటు ఫుడ్ డెలివరీ, ప్రయాణ, ఆన్‌లైన్ షాపింగ్‌లపై తగ్గింపు వంటి ప్రయోజనాలు లభించనున్నాయి. 365 రోజుల వ్యాలిడిటీతో వచ్చే ఈ ప్లాన్ ద్వారా స్విగ్గీలో రూ. 249 ఆర్డర్‌పై రూ. 100 డిస్కౌంట్, ఆన్‌లైన్ ప్లాట్‌ఫామ్ యాత్ర ద్వారా బుక్ చేసుకున్న విమాన టికెట్లపై రూ. 1,500 వరకు రాయితీ, షాపింగ్ ప్లాట్‌ఫామ్ అజియోలో ఎంపిక చేసిన ఉత్పత్తులపై రూ. 999పైన కొనుగోలుతో రూ. 200 డిస్కౌంట్ పొందే అవకాశం ఉంది.
అలాగే, జియో టీవీ, జియో సినిమా, జియో క్లౌడ్ యాప్‌లను ఉచితంగా వాడుకోవచ్చు. అంతేకాకుండా అపరిమితంగా 5జీ డేటాను పొందవచ్చు. ఇక, 336 రోజుల వ్యాలిడిటీతో జియో రూ. 2,545 ప్రీపెయిడ్ ప్లాన్‌ను కూడా ప్రకటించింది. ఈ ప్లాన్‌తో రోజుకు 1.5 జీబీ డేటా, అపరిమిత కాల్స్, రోజుకు 100 ఎస్ఎంఎస్‌లు లభిస్తాయి.
