జనసేనతో పొత్తు లేదు : బండి సంజయ్

దిశ, వెబ్‌డెస్క్: గ్రేటర్ హైదరాబాద్ మున్సిపల్ ఎన్నికల షెడ్యూల్ విడుదల కావడంతో అన్ని పార్టీలు అప్రమత్తం అయ్యాయి. ఈ నేపథ్యంలో జీహెచ్ఎంసీ ఎన్నికల్లో జనసేన పార్టీతో బీజేపీ పొత్తు విషయంపై బీజేపీ రాష్ట్ర అధ్యక్షుడు బండి సంజయ్ స్పష్టత ఇచ్చారు. ఈ సందర్భంగా గురువారం ఆయన మీడియాతో మాట్లాడుతూ… గ్రేటర్ ఎన్నికల్లో జనసేనతో బీజేపీ పొత్తు పెట్టుకోవడం లేదని స్పష్టం చేశారు. పొత్తు విషయంపై తాము ఇప్పటివరకూ పవన్ కళ్యాణ్‌ను సంప్రదించలేదని వెల్లడించారు. కావాలనే కొందరు మా రెండు పార్టీల మధ్య చిచ్చు పెట్టే కుట్ర చేస్తున్నారని ఆగ్రహం వ్యక్తం చేశారు. నామినేషన్ ప్రక్రియ పూర్తయ్యాక పవన్ కళ్యాణ్‌ను కలుస్తామని అన్నారు. ఈ ఎన్నికల్లో టికెట్ ఎవరికిచ్చినా బీజేపీ కార్యకర్తలు అభ్యర్థి గెలుపు కోసం పనిచేయాలని సూచించారు. ఎవరన్నా ఆందోళనకు దిగితే కఠిన చర్యలు తప్పవని బండి సంజయ్ హెచ్చరించారు. పార్టీ వ్యతిరేక కార్యకలాపాలకు పాల్పడితే శాశ్వత బహిష్కరణ ఉంటుందని తెలిపారు.