కట్టలు తెంచుకున్న బండ్ల గణేష్ అభిమానం.. దద్దరిల్లిన ‘వకీల్ సాబ్’ స్టేజ్

దిశ, వెబ్ డెస్క్: పవన్ కళ్యాణ్ కు అభిమానులు ఉండరు.. భక్తులు మాత్రమే ఉంటారు అని చాలామంది చాలా వేదికల్లో చెప్తూనే ఉంటారు. ఆయనపై అభిమానం అలాంటిది మరి. ఆలాంటి భక్తుల్లో ప్రముఖంగా చెప్పుకోవాల్సింది నటుడు, నిర్మాత అయిన బండ్ల గణేష్ గురించి. బండ్ల గణేష్‌కి పవన్ కళ్యాణ్ అంటే ఎంత పిచ్చో ప్రత్యేకంగా చెప్పాల్సిన పనిలేదు. తాజాగా ఆయన మరోసారి పవన్ గురుంచి ఆసక్తికర వ్యాఖ్యలు చేసారు. పవన్ కళ్యాణ్ నటిస్తున్న ‘వకీల్ సాబ్’ ప్రీ రిలీజ్ ఈవెంట్‌కి గెస్ట్‌గా వచ్చిన బండ్ల గణేష్ మాట్లాడిన తీరు ప్రేక్షకులకు నవ్వులు పూయించింది.

స్టేజ్ పైకి వస్తూనే .. “ఈశ్వరా .. పవనేశ్వరా .. పవరేశ్వరా” అంటూ అభిమానుల్లో ఒక్కసారిగా ఉత్సాహాన్ని రేకెత్తించాడు. పవన్ గురించి పురాణాలలోని దేవుళ్ల పేర్లను వాడుతూ గుక్కతిప్పుకోకుండా స్పీచ్ ఇచ్చాడు. అందరూ పుడతారు.. పోతారు.. కొంతమంది మాత్రమే చరిత్రలో ఉంటారు. పవన్ కల్యాణ్‌తో అబద్ధం చెప్పలేం.. ఆయన కళ్లు చూడగానే ఆ విషయమే మరిచిపోతాము. మీరంతా అనుకుంటున్నట్టు నేను పవన్ కి భక్తుడినే. ఏడుకొండలవాడికి అన్నమయ్య .. శివయ్యకి భక్త కన్నప్ప .. శ్రీరాముడికి హనుమంతుడు .. పవన్ కల్యాణ్‌కి బండ్ల గణేశ్ అంటూ అరిచాడు. ఇక ఈ మాటలతో స్టేజ్ అంతా దద్దరిల్లిపోయింది.

ఇక చివరికి పవన్ కళ్యాణ్‌కి పొగరనుకుంటారు.. అవును పొగరే.. కానీ ఆ పొగరు ఎలాంటిదో అంటూ కొన్ని ఉదాహరణలు చెప్పి అభిమానులను ఆనందోత్సహాలలో నింపేసాడు. మొత్తానికి ఈ ప్రీ రిలీజ్ ఈవెంట్‌కి బండ్ల గణేష్ స్పీచ్ హైలైట్‌గా నిలిచిందని చెప్పాలి.