Kadapa: యువకులపై కత్తులతో గుర్తుతెలియని వ్యక్తుల దాడి.. ఇద్దరి పరిస్థితి విషమం

దిశ, కడప: వైయస్సార్ జిల్లా ప్రొద్దుటూరు రామేశ్వరంలోని మోరీల వద్ద వేంపల్లె గ్రామానికి చెందిన ముగ్గరు యువకులపై గుర్తు తెలియని వ్యక్తులు కత్తులతో దాడి చేశారు. ఈ దాడిలో గాయపడిన ఇరువురి పరిస్థితి ఆందోళనకరంగా ఉంది. దీంతో చికిత్స నిమిత్తం కడప ప్రభుత్వసర్వజన ఆసుపత్రికి తరలించారు. వేంపల్లెకు చెందిన పవన్ కల్యాణ్, వెంకటేష్, నాగేంద్ర దసరా ఉత్సవాలను చూసేందుకు ప్రొద్దుటూరు వెళ్లారు.

అయితే ఆటోలో వెళుతుండగా గుర్తు తెలియని వ్యక్తులు బైకులతో ఢీ కొట్టారు. దీంతో ఇరువురి మధ్య వాగ్వాదం చోటు చేసుకుంది. యువకులపై దుండగులు కత్తులతో దాడి చేశారు. అనంతరం పొడిచి పారిపోయారు. తీవ్ర రక్తగాయాలతో ఉన్న బాధితులను చికిత్స నిమిత్తం ప్రొద్దుటూరు జిల్లా ఆసుపత్రికి తరలించి ప్రాథమిక వైద్యం అందించారు. ఆ తర్వాత మెరుగైన చికిత్స కోసం కడప ప్రభుత్వ సర్వజన ఆసుపత్రికి తరలించారు. కత్తులతో పొడిచి పారిపోతున్న వారిని స్థానికులు అడ్డుకునే ప్రయత్నం చేయడంతో ద్విచక్ర వాహనాన్ని వదలి పారిపోయారు. ఈ మేరకు పోలీసులు కేసు నమోదు చేసుకొని దర్యాప్తు చేస్తున్నారు. దాడి చేసిన వారి కోసం పోలీసులు గాలిస్తున్నారు.