Ap News: తిరుమలలో అమిత్ షా..శుక్రవారం షెడ్యూల్ ఇదే..!
దిశ, వెబ్ డెస్క్: కేంద్రహోంమంత్రి అమిత్ షా తిరుమల చేరుకున్నారు. ప్రత్యేక విమానంలో ఢిల్లీ నుంచి తిరుపతి రేణిగుంట ఎయిర్ పోర్టుకు ఆయన వెళ్లారు. అనంతరం అక్కడి నుంచి తిరుమల కొండపైకి చేరుకున్నారు. ఈ రోజు రాత్రి తిరుమల వకుళామాత గెస్ట్ హౌస్‌లో ఆయన బస చేయనున్నారు. శుక్రవారం ఉదయం 8.30 నిమిషాలకు వెంకన్న స్వామి సేవలో పాల్గొంటారు. ఇక తిరుమలకు చేరుకున్న అమిత్ షాకు టీటీడీ అధికారులు స్వాగతం పలికారు. శుక్రవారం ఉదయం స్వామివారిని అమిత్ షా దర్శించేందుకు అన్ని ఏర్పాట్లు చేశారు. దర్శనాంతరం తిరుపతి విమానాశ్రయం నుంచి అమిత్ షా నేరుగా రాజ్ కోట్ బయల్దేరి వెళ్లనున్నారు.
కాగా తిరుమలలో భక్తుల రద్దీ కొనసాగుతోంది. వేసవి సెలవులు ముగియనుండటంతో భక్తులు కుటుంబ సమేతంగా భారీగా తరలివస్తున్నారు. వారాంతం సమయంలో ఈ రద్దీ మరింతగా పెరుగుతోంది. భక్తుల రద్దీ దృష్ట్యా వీఐపీ బ్రేక్ దర్శనాలను జూన్ 30 వరకూ శుక్ర, శని, ఆదివారాల్లో రద్దు చేశారు.
