Breaking: టీటీడీ డిప్యూటీ ఈఈ శ్రీలక్ష్మి అరెస్ట్

దిశ, వెబ్ డెస్క్: టీటీడీ డిప్యూటీ ఈఈ శ్రీలక్ష్మిని తిరుపతి పోలీసులు అరెస్ట్ చేశారు. హత్యయత్నం కేసులో ఆమెతో పాటు భర్త గిరీశ్ చంద్రారెడ్డి, మరో ఇద్దరిని అరెస్ట్ చేశారు. ఈ నెల 25న తిరుపతి ఎన్జీవో కాలనీలో వెంకట శివారెడ్డి అనే వ్యక్తిపై హత్యాయత్నం జరిగింది. ఈ ఘటనపై పోలీసులు కేసు నమోదు చేసి దర్యాప్తు చేశారు. హత్యాయత్నం జరిగిన ప్రాంతంలో సీసీ టీవీ ఫుటేజులను పరిశీలించారు. నిందితులను గుర్తించారు. ఈ మేరకు తిరుమల తిరుపతి దేవస్థానం డిప్యూటీ ఈఈ శ్రీలక్ష్మిని అదుపులోకి తీసుకున్నారు. అనంతరం అరెస్ట్ చేసి రిమాండ్‌కు తరలించారు.

కాగా వెంకట శివారెడ్డి, శ్రీలక్ష్మి ఇళ్లు ఎదురుగా ఉన్నాయి. అయితే కొన్ని కారణాల రెండు కుటుంబాల మధ్య తరచూ గొడవలు జరిగాయి. దీంతో వెంకట శివా రెడ్డిపై శ్రీలక్ష్మి దంపతులు కోపం పెంచుకున్నారు. అదును చూసి వెంకటశివారెడ్డిపై ఇద్దరితో దాడి చేయించారు. ఈ దాడిలో గాయపడిన వెంకట శివారెడ్డి రెడ్డి పరిస్థితి విషమంగా ఉందని తెలుస్తోంది. దీంతో స్థానిక సీసీ టీవీ ఫుటేజ్‌ను పరిశీలించారు. శివారెడ్డి బైక్‌ను ఇద్దరు వ్యక్తులు అడ్డగించి దాడి చేసినట్లు ఫుటేజ్‌లో వీడియో రికార్డు అయింది. అయితే స్పష్టంగా లేకపోవడంతో శివారెడ్డితో ఎవరికైనా శత్రుత్వం ఉందా అని ఆరా తీశారు. దీంతో శివారెడ్డి ఇంటికి ఎదురుగా ఉన్న శ్రీలక్ష్మి దంపతులుగా గుర్తించారు.