Tirumala Updates: తిరుమలలో భక్తజన సందోహం.. శిలాతోరణం వరకు భక్తుల క్యూ లైన్

దిశ, వెబ్‌డెస్క్: దేవదేవుడు శ్రీ వేంకటేశ్వరుడి దివ్య సన్నిథి తిరుమల క్షేత్రానికి భక్తుల తాకిడి పెరిగింది. శుక్రవారం శ్రీవారిని దర్శనానికి తండోపతండాలుగా జనం తరలివచ్చారు. ఈ మేరకు టోకెన్లు లేని భక్తులకు దర్శనానికి దాదాపు 21 గంటల సమయం పడుతోంది. తెలుగు రాష్ట్రాల్లో విద్యార్థులకు వేసవి సెలవులు ముగుస్తుండటంతో భక్తుల రద్దీ విపరీతంగా పెరిగింది. అదేవిధంగా పొరుగు రాష్ట్రాలైన తమిళనాడు, కర్ణాటక, కేరళ రాష్ట్రాల నుంచి భక్తుల శ్రీవారిని దర్శించుకునేందుకు పోటెత్తారు. ఇక రూ.300 ప్రత్యేక దర్శనానికి సుమారు 5 గంటల సమయం పడుతోంది. శుక్రవారం వైకుంఠం క్యూ కాంప్లెక్స్‌లోని అన్ని కంపార్ట్‌మెంట్లలో భక్తులు శ్రీవారి దర్శనం కోసం వేచి చూస్తున్నారు. సర్వ దర్శన కంపార్టుమెంట్లు నిండి శిలాతోరణం వరకు భక్తుల క్యూ లైన్ కొనసాగుతోంది. గురువారం స్వామి వారిని 61,409 మంది భక్తులు దర్శించుకున్నారు. శ్రీవారి హుండీ ఆదాయం రూ.3.04 కోట్లు వచ్చాయని టీటీడీ అధికారులు వెల్లడించారు.