హిందీ భాషపై పవన్ వ్యాఖ్యలు.. నటుడు ప్రకాశ్ రాజ్ సంచలన ట్వీట్

దిశ, వెబ్ డెస్క్: హిందీ భాష(Hindi Language)పై వివాదం కొనసాగుతూనే ఉంది. హిందీ భాషను తమపై బలవంతంగా రుద్దవద్దని తమిళనాడు ప్రభుత్వం(Tamilanadu Government) అంటుంటే.. అన్నీ దేశ భాషలేకదా జనసేన అధినేత పవన్ కల్యాణ్(Jana Sena chief Pawan Kalyan) అంటున్నారు. వేరు అనుకుంటే తమిళ సినిమాలను ఇతర భాషల్లోకి డబ్ చేయొద్దని సలహా ఇస్తున్నారు.

ఇప్పుడు ఈ సలహాలే వివాదాస్పదమవుతున్నాయి. పవన్ కల్యాణ్ చేసిన ఈ వ్యాఖ్యలను నటుడు ప్రకాశ్ రాజ్(Actor Prakash Raj) తప్పుబట్టారు. ఎక్స్ వేదికగా ఆయన సంచలన ట్వీట్ చేశారు. "మీ హిందీ భాషను మా మీద రుద్దకండి", అని చెప్పడం ఇంకో భాషను ద్వేషించడం కాదు, “ స్వాభిమానంతో మా మాతృభాషను, మా తల్లిని కాపాడుకోవడమని పవన్ కల్యాణ్‌కి ఎవరైనా చెప్పండి please.’’. అంటూ ప్రకాశ్ రాజ్ ట్వీట్ చేశారు.

కాగా ప్రస్తుతం భాష, సంస్కృతినీ కొందరు తిడుతున్నారని జనసేన పార్టీ ఆవిర్భావ సభలో ఆ పార్టీ అధినేత, డిప్యూటీ సీఎం పవన్ కల్యాణ్ వ్యాఖ్యానించారు. హిందీని రుద్దుతున్నారంటూ తమిళనాడు ప్రభుత్వాన్ని ఉద్దేశించి ఆయన మండిపడ్డారు. తమిళనాడులో హిందీ వద్దని అంటున్నారని, అలాగైతే వాళ్ల సినిమాలను హిందీలోకి అనువదించవద్దని సలహా ఇచ్చారు. హిందీవాళ్ల డబ్బులు కావాలి కానీ ఆ భాష వద్దంటే ఎలా? అని ప్రశ్నించారు. భాషలను ద్వేషించాల్సిన అవసరం లేదన్నారు. దేశానికి తమిళం సహా బహుళ భాషలు కావాలన్నారు. బహుభాషలే దేశానికి మంచిదని హితవు పలికారు. నార్త్‌, సౌత్‌ విభజన, కుల గణన, డీలిమిటేషన్‌, త్రిభాషా ఫార్ములా గురించి చాలా మంది మాట్లాడుతున్నారన్నారని, ఆంధ్రాను విభజిస్తే దేశంలో ఉండమని చాలా మంది అప్పుడన్నారని గుర్తు చేశారు. దేశాన్ని కట్‌ చేయడానికి ఇండియా కేకు ముక్కా? అని పవన్ నిలదీశారు.

ఇండియా అంటే.. ఉత్తర భారతదేశం హిమాలయాల్లో పరమశివుడున్న కైలాసం దగ్గర నుంచి దక్షిణ భారతంలో మురుగన్‌ నివాసం వరకు అని పవన్ కల్యాణ్ పేర్కొన్నారు. దేశాన్ని విడగొట్టే ధైర్యం, సాహసం ఎవరికైనా ఉందని తాను అనుకోననని ఆయన తెలిపారు. రాజకీయ వైరుధ్యాలతో దేశాన్ని ముక్కలు చేయవద్దని, డీలిమిటేషన్‌పై చర్చ పెట్లాలని కోరడం తప్పులేదని, కానీ రూపీ సింబల్‌ మార్చుతామని చెప్పడం ఎంత కరెక్ట్ అని ప్రశ్నించారు. విధ్వంసం చేయడం చాలా సులువని, నిర్మాణమే చాలా కష్టమన్నారు. తమిళనాడులో చదువుతున్న సమయంలో తానూ వివక్షకు గురయ్యానని, గోల్టి అని తనను పిలిచేవారని చెప్పారు. గోల్టీ అంటే తెలుగుకు రివర్స్‌ అని తమ మాస్టర్‌ చెప్పారని పవన్ కల్యాణ్ తెలిపారు.

"మీ హిందీ భాషను మా మీద రుద్దకండి", అని చెప్పడం ఇంకో భాషను ద్వేషించడం కాదు, “ స్వాభిమానంతో మా మాతృభాషను, మా తల్లిని కాపాడుకోవడం", అని పవన్ కళ్యాణ్ గారికి ఎవరైనా చెప్పండి please... 🙏🏿🙏🏿🙏🏿 #justasking

— Prakash Raj (@prakashraaj) March 14, 2025