చంద్రబాబును అందుకే కలవలేకపోయా: సూపర్ స్టార్ రజినీకాంత్

దిశ, డైనమిక్ బ్యూరో : స్కిల్ స్కామ్ కేసులో టీడీపీ అధినేత అరెస్ట్ అయి రాజమహేంద్రవరం సెంట్రల్ జైలులో రిమాండ్ ఖైదీగా ఉన్న సంగతి తెలిసిందే. చంద్రబాబు నాయుడు అరెస్ట్, రిమాండ్‌పై తమిళ సూపర్ స్టార్ రజినీకాంత్ తీవ్ర విచారం వ్యక్తం చేసిన సంగతి తెలిసిందే. రాజమహేంద్రవరం సెంట్రల్ జైలులో చంద్రబాబు నాయుడిని రజినీకాంత్ కలుస్తారంటూ వార్తలు హల్‌చల్ చేశాయి. అయితే రజినీకాంత్ రాజమహేంద్రవరం సెంట్రల్ జైలుకు వెళ్లడం లేదని ఆయన కార్యాలయం సిబ్బంది తెలిపారు. అయితే తాజాగా ఈ అంశంపై రజినీకాంత్ స్పందించారు.‘చంద్రబాబు నాయుడిని కలిసేందుకు వెళ్లాలనుకున్నా... అయితే ఫ్యామిలీ ఫంక్షన్‌ కారణంగా అది కుదరలేదు’ అని రజినీకాంత్‌ చెప్పుకొచ్చారు. తలైవా ఆదివారం ఉదయం తమ కుటుంబ సభ్యుల కార్యక్రమంలో పాల్గొనేందుకు చెన్నై విమానాశ్రయం నుంచి కోయంబత్తూరుకు బయలుదేరి వెళ్లారు. ఈ సందర్భంగా రజనీకాంత్‌ను నేషనల్ మీడియా కలిసింది. చంద్రబాబు నాయుడిని కలిసేందుకు ఎప్పుడు వెళతారు ? అని ప్రశ్నించింది. ఇందుకు రజినీకాంత్ వివరణ ఇచ్చారు. చంద్రబాబు నాయుడిని కలిసేందుకు వెళ్లాలనుకున్నట్లు తెలిపారు. అయితే ఫ్యామిలీ ఫంక్షన్‌ కారణంగా అది కుదరలేదని వివరణ ఇచ్చారు. అంటే చంద్రబాబును కలిసేందుకు రజినీకాంత్ ప్రయత్నించారనే ప్రచారం జరగడం నిజమేనని తెలుస్తోంది. ఇకపోతే చంద్రబాబు నాయుడు, రజనీకాంత్‌ మధ్య దశాబ్ధాలుగా ప్రత్యేక అనుబంధం ఉంది. ఎన్టీఆర్ శత జయంతి వేడుకలకు సైతం ముఖ్యఅతిథిగా హాజరయ్యారు. చంద్రబాబును అరెస్ట్ అయినప్పుడు రజినీకాంత్ ఫోన్‌లో లోకేశ్‌ను పరామర్శించిన సంగతి తెలిసిందే.