Ap News: అసెంబ్లీ ఇష్యూ.. తగ్గేదేలే అంటున్న బాలయ్య

దిశ, వెబ్ డెస్క్: వైసీపీ ఎమ్మెల్యేలు అసెంబ్లీలో ఎంత దుందుడుకుగా వ్యవహరించినా వెనక్కి తగ్గేదేలేదని టీడీపీ ఎమ్మెల్యే నందమూరి బాలకృష్ణ అన్నారు. చంద్రబాబు అరెస్ట్, అసెంబ్లీలో వైసీపీ సభ్యుల తీరుపై టీడీపీ ఎల్పీ సమావేశంలో ఆయన చర్చించారు. చంద్రబాబు అక్రమ అరెస్ట్‌పై అసెంబ్లీలో వైసీపీ పవర్ పాయింట్ ప్రజెంటేషన్ ఇస్తే.. తమకూ అవకాశం ఇవ్వాలని స్పీకర్‌ను కోరదామని టీడీపీ నేతలకు బాలయ్య సూచించారు. స్పీకర్ అనుమతి ఇవ్వకపోతే అసెంబ్లీ బయట పవర్ పాయింట్ ప్రజెంటేషన్ ఇచ్చేందుకు ఏర్పాట్లు చేయాలన్నారు. ఇదే అంశంపై అటు శాసనమండలిలోనూ పట్టుబట్టాలని టీడీపీ ఎమ్మెల్యేలకు ఎమ్మెల్యే బాలయ్య సూచించారు.

కాగా ఇవాళ అసెంబ్లీ జరిగిన తీరుపై కూడా టీడీఎల్పీ సమావేశంలో ఆ పార్టీ ఎమ్మెల్యేలు చర్చించారు. టీడీపీ ఎమ్మెల్యేలను యూజ్‌లెస్ ఫెలోస్ అని స్పీకర్ తమ్మినేని అనడంపై అభ్యంతరం వ్యక్తం చేశారు. స్పీకర్ ఏకపక్షంగా వ్యవహరిస్తున్నారని మండిపడ్డారు. శుక్రవారం జరగబోయే అసెంబ్లీ సమావేశాల్లో స్పీకర్ తీరును ఎండగట్టాలని నిర్ణయించారు. అసెంబ్లీలో వైసీపీ ఎమ్మెల్యేల తీరు చూస్తేంటే భౌతిక దాడులకు పాల్పడతారనే అనుమానాన్ని టీడీపీ ఎమ్మెల్యేలు వ్యక్తం చేశారు.