ఆదరించండి.. అండగా ఉంటాం: Nara Lokesh
దిశ, ఏపీ బ్యూరో: ‘రోడ్లకు టెండర్లు పిలిస్తే కాంట్రాక్టర్లు పారిపోతున్నారు. జగన్ సర్కారు అధ్వాన పాలనకు ఇదే నిదర్శనం. టీడీపీ ప్రభుత్వం వచ్చిన వెంటనే కొత్త రహదారులు నిర్మించి ట్రాఫిక్ సమస్యలను నివారిస్తాం’అని టీడీపీ జాతీయ ప్రధాన కార్యదర్శి నారా లోకేష్ హామీనిచ్చారు. లోకేష్ యువగళం యాత్ర విశాఖ జిల్లా పాయకరావు పేట నియోజకవర్గంలోకి సాగింది. రైల్వే ట్రాక్పై ఓవర్ బ్రిడ్జి నిర్మించాలని ఇందిరా కాలనీ, రాజీవ్ కాలనీ, దుర్గా కాలనీ, లింగాల కాలనీలకు చెందిన ప్రజలు విన్నవించారు.
పాయకరావు పేట ప్రజలు ట్రాఫిక్ సమస్యలను లోకేష్ దృష్టికి తీసుకొచ్చారు. జగన్ అధికారానికి వచ్చాక స్థానిక సంస్థలకు నిధులు నిలిపేసి నిర్వీర్యం చేసిన ఫలితంగా ప్రజలు ఇబ్బందులు పడుతున్నట్లు లోకేశ్ తెలిపారు. టీడీపీ ప్రభుత్వం వచ్చాక మౌలిక సదుపాయాల కల్పనపై ప్రత్యేక డ్రైవ్ చేపడతామన్నారు. నగరాలు, పట్టణాల్లో మురుగునీటి పారుదల వ్యవస్థను మెరుగు పరుస్తామని హామీనిచ్చారు.
అచ్యుతాపురం సెజ్లో పరిశ్రమలు వెదజల్లే కాలుష్యానికి మత్స్యకారులతోపాటు వెంకటనగరం గ్రామ ప్రజలు ఇబ్బందులు పడ్తున్నట్లు లోకేష్కు వినతి పత్రం సమర్పించారు. ఈ పరిశ్రమలు కాలుష్యాన్ని వదిలే పైపులైన్ల వల్ల ప్రజలు క్యాన్సర్, గుండె, ఊపిరితుత్తుల జబ్బుల బారిన పడుతున్నట్లు ఆవేదన వ్యక్తం చేశారు. మహిళల్లో సంతానోత్పత్తి తగ్గిపోతుందని చెప్పారు. గ్రామస్తుల సమస్యలపై లోకేష్ స్పందిస్తూ జగన్ ముడుపులు దండుకొని ఇష్టారీతిన కాలుష్య కారక పరిశ్రమలకు అనుమతులు ఇచ్చినట్లు ఆరోపించారు. టీడీపీ అధికారానికి వచ్చాక సముద్ర జలాలు కలుషితం కాకుండా తీరం వెంబడి ట్రీట్ మెంటు ప్లాంట్లు నెలకొల్పుతామని భరోసానిచ్చారు. మత్స్యకారుల పిల్లలకు పరిశ్రమల్లో ఉద్యోగ అవకాశాలు కల్పిస్తామని లోకేష్ హామీనిచ్చారు.
