PawanKalyan: ఇటీవలే ఆరా తీశా.. ఇంతలోనే..!
దిశ, డైనమిక్ బ్యూరో: తెలుగు సినీ పరిశ్రమలో తనకంటూ ప్రత్యేక స్థానాన్ని సొంతం చేసుకున్న ప్రముఖ నటులు కైకాల సత్యనారాయణ మరణవార్త తెలుసుకుని తీవ్ర ఆవేదనకు లోనయ్యానని జనసేన అధినేత పవన్ కల్యాణ్ తెలిపారు. కైకాల ఆత్మకు శాంతి చేకూరాలని భగవంతుణ్ణి ప్రార్థిస్తున్నట్లు పవన్ కల్యాణ్ తెలిపారు. మెగాస్టార్ చిరంజీవితో కలిసి కైకాల సత్యనారాయణ నివాసానికి వెళ్లారు. కైకాల పార్థివదేహానికి పూలమాలలు వేసి నివాళులర్పించారు.
అనంతరం పవన్ కల్యాణ్ మాట్లాడుతూ తమ కుటుంబానికి సత్యనారాయణ సన్నిహితులు అని చెప్పారు. చెన్నైలో ఉన్నప్పటి నుంచి అన్నయ్య చిరంజీవితోను, మాతోనూ ఆప్యాయంగా ఉండేవారని ఆయన గుర్తు చేశారు. ఇటీవల ఆయన ఆరోగ్యం గురించి ఆరా తీశానని, ఇంతలో ఇలాంటి వార్త వినాల్సి రావడం బాధాకరమన్నారు. 'సత్యనారాయణని అభిమానులు నవరస నటనా సార్వభౌమ అనడంలో అతిశయోక్తి లేదు. ప్రతినాయక పాత్రలను ఎంత అవలీలగా పోషించారో అదే స్థాయిలో కరుణరస ప్రధానమైన పాత్రల్లోనూ ఒదిగిపోయారు. పౌరాణిక పాత్రలకు ప్రాణం పోశారు. తెలుగువారికి యమధర్మరాజు అంటే సత్యనారాయణే. ఆ పాత్రలో మరొకరిని ఊహించలేని విధంగా చేశారు. ఏ తరహా పాత్రనైనా ప్రేక్షకుల మెప్పు పొందేలా నటించారు. నిర్మాతగాను మంచి చిత్రాలు అందించారు. లోక్ సభ సభ్యుడిగా ప్రజా జీవితంలో ఉన్నారు. తెలుగుదనం మూర్తీభవించిన సత్యనారాయణ లేని లోటు తెలుగు చిత్రసీమలో తీర్చలేనిది.' అని పవన్ కల్యాణ్ పేర్కొన్నారు.
