హస్తినలో తేలుస్తాం: ఈ నెల 28న ఢిల్లీకి చంద్రబాబు

దిశ, డైనమిక్ బ్యూరో : తెలుగుదేశం పార్టీ అధినేత చంద్రబాబు నాయుడు హస్తిన పర్యటనకు వెళ్లనున్నట్లు తెలుస్తోంది. ఈ నెల28న ఢిల్లీకి చంద్రబాబు వెళ్లనున్నట్లు తెలుస్తోంది. కేంద్ర ప్రధాన ఎన్నికల కమిషనర్‌ను కలిసేందుకే ఢిల్లీ వెళ్తున్నారని పార్టీ వర్గాలు తెలిపాయి. ఈమేరకు సీఈసీ అపాయింట్మెంట్ కోరుతూ టీడీపీ కార్యాలయం లేఖ రాసినట్లు తెలుస్తోంది. ఏపీలో అధికార వైసీపీ దొంగ ఓట్లు చేర్చడం, ప్రతిపక్ష సానుభూతిపరుల ఓట్లు తొలగించడంపై సిఈసీకి చంద్రబాబు నాయుడు ఫిర్యాదు చేయనున్నట్లు తెలుస్తోంది. సాక్ష్యాధారాలను సీఈసీకి అందించాలని నిర్ణయించారు. ఆయా జిల్లా అధికారులకు టీడీపీ నేతలు ఫిర్యాదులు చేసినా, వారు స్పందించని వైనాన్ని సీఈసీకి వివరించనున్నారు. ఏపీ ఓటర్ల జాబితాలో అక్రమాలపై సమాచార సేకరణకు ఇప్పటికే టీడీపీ కేంద్ర కార్యాలయంలో ప్రత్యేక విభాగం ఏర్పాటు చేసిన సంగతి తెలిసిందే. ఇప్పటికే ఉరవకొండలో అక్రమంగా ఓట్లు తొలగించారనే ఆరోపణల నేపథ్యంలో పలువురు ఉన్నతాధికారులపై కేంద్ర ఎన్నికల సంఘం చర్యలు తీసుకున్న సంగతి తెలిసిందే. ఈ నేపథ్యంలో మరోసారి చంద్రబాబు ఇదే అంశంపై ఢిల్లీ వెళ్లి స్వయంగా సీఈసీకి ఫిర్యాదు చేయనున్న అంశంపై సర్వత్రా ఉత్కంఠ నెలకొంది.