VV Vinayak: కొడాలి నాని వల్లే ఈ స్థాయిలో ఉన్నా
- నానితో సినిమా చేసేందుకు నేను రెడీ
- ప్రముఖ సినీ దర్శకుడు వీవీ వినాయక్
దిశ, డైనమిక్ బ్యూరో: మాజీమంత్రి కొడాలి నానిపై ప్రముఖ సినీ దర్శకుడు వీవీ వినాయక్ ప్రశంసలు కురిపించారు. ఈరోజు తాను ఈ స్థాయిలో ఉన్నానంటే అందుకు కొడాలి నానియే కారణమని చెప్పారు. అందుకే కొడాలి నాని అంటే తనకు ఎంతో ఇష్టమని తెలిపారు. సంక్రాంతి సందర్భంగా కృష్ణా జిల్లా గుడివాడలో నిర్వహించిన జాతీయ స్థాయి ఒంగోలు జాతి ఎడ్ల బండ లాగుడు ప్రదర్శన పోటీలకు దర్శకుడు వీవీ వినాయక్ ముఖ్య అతిథిగా హాజరయ్యారు. నానితో కలిసి ఎడ్ల బండలాగుడు ప్రదర్శనలను తిలకించారు.
ఈ సందర్భంగా వీవీ వినాయక్ మాట్లాడుతూ సంక్రాంతి సంబరాల్లో పాల్గొనడం చాలా ఆనందంగా ఉందన్నారు. గుడివాడలో జరుగుతున్న జాతీయ స్థాయి ఒంగోలు జాతి ఎడ్ల బండ లాగుడు ప్రదర్శనలను ఫస్ట్ టైమ్ చూశానని చెప్పారు. కొడాలి నానితో సినిమా చేసేందుకు తాను సిద్ధంగా ఉన్నట్లు స్పష్టం చేశారు. నిర్మాతగా ఎప్పుడు సై అంటే అప్పుడు తాను సినిమా చేస్తానని పేర్కొన్నారు. ప్రస్తుతం హిందీలో ఓ సినిమా తీస్తున్నట్లు తెలిపిన ఆయన ఆ మూవీ మార్చిలో విడుదల అవుతుందని తెలిపారు. అనంతరం తెలుగు సినిమా చేస్తానని వీవీ వినాయక్ ప్రకటించారు.
కాగా వీవీ వినాయక్ మాజీమంత్రి కొడాలి నాని, జూనియర్ ఎన్టీఆర్‌లు మంచి స్నేహితులు. కొడాలి నానికి టీడీపీ టికెట్ రావడంలో జూనియర్ ఎన్టీఆర్, వీవీ వినాయక్‌లు కీలక పాత్ర పోషించారని ప్రచారం ఉంది. గతంలో కొడాలి నాని సైతం మచిలీపట్నం ఎంపీగా వీవీ వినాయక్ పోటీ చేస్తారంటూ కీలక వ్యాఖ్యలు చేశారు. అయితే ఆ వ్యాఖ్యలను వీవీ వినాయక్ ఖండించిన సంగతి తెలిసిందే. ఎమ్మెల్యే కొడాలి నానికి తనపై ఉన్న ప్రేమతో, చనువుతో అలా సరదాగా మాట్లాడారే తప్ప తనకు రాజకీయాలపై ఆసక్తి లేదని దర్శకుడు వినాయక్ ప్రకటించిన సంగతి తెలిసిందే.
