Gang War: బెజవాడలో బ్లేడ్ బ్యాచ్ కలకలం.... నెత్తురోడేలా దాడులు
దిశ, డైనమిక్ బ్యూరో: బెజవాడలో గ్యాంగ్ వార్ కలకలం రేపింది. ఒక బ్లేడ్ బ్యాచ్.. మరో బ్లేడ్ బ్యాచ్‌పై విరుచుకుపడింది. దీంతో పలువురు తీవ్ర గాయాలపాలయ్యారు. గురువారం జరిగిన ఈ ఘటన ఆలస్యంగా వెలుగులోకి వచ్చింది. కొత్తపేట పోలీస్ స్టేషన్ పరిధిలో గంజాయి సేవించే రెండు బ్లేడ్ బ్యాచ్‌ల మధ్య వార్ నడుస్తోంది. అయితే గురువారం రాత్రి గణి అనే బ్లేడ్ బ్యాచ్‌కి ఆంజనేయ వాగు సమీపంలో ఉండే సాంబా అనే యువకుడు మధ్య వాగ్వాదం చోటు చేసుకుంది.
అయితే హరి బ్యాచ్ ఈ విషయం తెలుసుకుంది. గణి బ్యాచ్‌ను పోలీసులకు పట్టించింది. పోలీసులకు అప్పగించారనే కక్షతో హరి బ్యాచ్ సభ్యులపై గణి బ్యాచ్ దాడికి పాల్పడింది. ఆంజనేయ వాల్ సెంటర్ కొండ ప్రాంతంలో గని బ్యాచ్ సభ్యుడైన అఖిల్ మరో ఆరుగురు బ్లేడ్ బ్యాచ్ యువకులతో అక్కడికి చేరుకొని బ్లేడ్లతో విచక్షణ రహితంగా దాడికి పాల్పడ్డారు. ఈ దాడిలో హరి బ్యాచ్‌కు చెందిన అఖిల్, శీను అనే యువకులు గాయపడ్డారు. ప్రశాంతంగా ఉండే ప్రాంతంలో ఒక్కసారిగా గ్యాంగ్ వార్ బహిరంగంగా ముష్టియుద్దాలు, నెత్తురోడేలా బ్లేడ్లతో దాడులకు పాల్పడటంతో స్థానికులు ఒక్కసారిగా భయాందోళనకు గురయ్యారు.
