హలో.......లోకేశ్! తమరి లొకేషన్ ఎక్కడ ?: మంత్రి అంబటి ఆసక్తికర ట్వీట్

దిశ, డైనమిక్ బ్యూరో : స్కిల్ స్కామ్ కేసులో టీడీపీ అధినేత చంద్రబాబు నాయుడు అరెస్టై రాజమహేంద్రవరం సెంట్రల్ జైలులో రిమాండ్ ఖైదీగా ఉన్న సంగతి తెలిసిందే. ఈ కేసు నుంచి చంద్రబాబు నాయుడును బయటపడేసేందుకు టీడీపీ శత విధాలా ప్రయత్నిస్తోంది. సుప్రీంకోర్టు న్యాయవాదులను సైతం రంగంలోకి దించింది. అయినప్పటికీ హైకోర్టు చంద్రబాబు క్వాష్ పిటిషన్‌ను కొట్టివేసింది. మరోవైపు చంద్రబాబును సీఐడీ కస్టడీకి అనుమతినిచ్చింది. అంతేకాదు చంద్రబాబు నాయుడు రిమాండ్‌ను మరో రెండు రోజులపాటు పొడిగించింది. ఇలా ఒకే రోజు మూడు అంశాలలో చంద్రబాబుకు కోర్టుల్లో చుక్కెదురు అయ్యింది. ఇకపోతే చంద్రబాబు నాయుడు అరెస్ట్‌ను నిరసిస్తూ జాతీయ స్థాయిలో ఉద్యమించేందుకు ఢిల్లీలో నారా లోకేశ్ మకాం వేసిన సంగతి తెలిసిందే. అయితే శుక్రవారం కోర్టుల్లో ఎదురుదెబ్బ తగలడంతో లోకేశ్‌పై మంత్రి అంబటి రాంబాబు చమత్కరించారు. కీలకమైన ట్వీట్ చేశారు. ‘హలో.......లోకేశ్! తమరి లొకేషన్ ఎక్కడ ?’ అంటూ ఎక్స్‌లో పోస్టు చేశారు. ఈ పోస్టుపై వైసీపీ నేతలు ఇంకెక్కడ ఢిల్లీలో అంటూ చెప్పుకొస్తున్నారు. నెక్ట్స్ అరెస్ట్ అయ్యేది లోకేశ్ అని తెలిసే ఢిల్లీలో దాకున్నారంటూ సెటైర్లు వేస్తున్నారు. టీడీపీ వాళ్లు మాత్రం ఢిల్లీలో ఉన్నారు ఆమాత్రం తెలియడం లేదా అంటూ కౌంటర్ ఇస్తున్నారు.