Vinukonda: పవన్ కళ్యాణ్ దృష్టికి రోడ్డు సమస్య
దిశ, వినుకొండ: రోడ్ల విషయంలో గాడ నిద్రలో ఉన్న ముఖ్యమంత్రి జగన్‌ని నిద్రలేపే విధంగా జనసేన పార్టీ నేతలు, కార్యకర్తలు వివిధ రూపాల్లో నిరసన కార్యక్రమాలు చేపడుతున్నారు. ఆ పార్టీ అధినేత పవన్ కళ్యాణ్ పిలుపుతో తాజాగా ‘గుడ్ మార్నింగ్ సీఎం సార్’ కార్యక్రమాన్ని వినుకొండలో చేపట్టారు. వినుకొండ నుంచి నుండి అద్దంకి వెళ్లే రోడ్డు మార్గాన్ని సందర్శించారు. ఈ సందర్భంగా గుంటూరు జిల్లా జనసేన పార్టీ ప్రధాన కార్యదర్శి నక్కా రమణారావు మాట్లాడుతూ వినుకొండ నుండి అద్దంకి వెళ్లే రోడ్డు మార్గం చాలా అధ్వానంగా, దారుణంగా, పెద్ద పెద్ద గుంతలతో ఉందని తెలిపారు. గత ప్రభుత్వం నుంచి ఈ రోడ్డును ఎవరూ పట్టించుకోవడం లేదని ఆయన తెలిపారు.
వినుకొండ నుండి అద్దంకి వెళ్లే ఈ రోడ్డు మార్గంలో పెద్ద కంచర్ల కాలనీ, గోనుగుంట్ల వారి పాలెం, ఏనుగుపాలెం గ్రామాల్లో గుంతలు చాలా ఎక్కువగా ఉన్నాయని నక్కా రమణారావు పేర్కొన్నారు. ఈ రోడ్డు మార్గంలో ప్రతిరోజు ఏదో ఒక రోడ్డు ప్రమాదం జరుగుతోందన్నారు. కనీసం గుంతలు బాగు చేయించమని కోరారు. లేనిపక్షంలో లీగల్‌గా పోరాడుతామని హెచ్చరించారు .ఈ రోడ్డు సమస్యను పవన్ కళ్యాణ్ దృష్టికి తీసుకువెళ్లి పరిష్కారం దిశగా పోరాటం చేస్తామని నక్కా రమణారావు తెలిపారు.
