సూపర్ సిక్స్ హామీల అమలులో కూటమి సర్కార్ వైఫల్యం : వైఎస్ షర్మిల

దిశ, వెబ్ డెస్క్ : రాష్ట్రంలో 22లోక్ సభ సీట్లకు గాను 21సీట్లను గెలిచి ప్రధాని మోడీకి ఇచ్చిన హామీని నెరవేర్చినందుకు గర్వపడుతున్నామన్న మంత్రి నారా లోకేష్ వ్యాఖ్యలకు ఏపీ పీసీసీ చీఫ్ వైఎస్.షర్మిల కౌంటర్ వేశారు. ప్రధాని మోడీ హామీ నెరవేర్చామన్న మీరు ఏపీ ప్రజలకు నెరవేర్చని హామీల గురించి ఒక్క మాట కూడా మాట్లాడలేదు ఎందుకని ట్విటర్ వేదికగా ప్రశ్నించారు. ఫ్రాంక్లీ స్పీకింగ్ అనే టీవీ షోలో మిమ్మల్ని చూడడం చాలా బాగుందని, కానీ ఇప్పుడు ఏపీ ప్రజలకు తమరు ఇచ్చిన వాగ్దానాలను నెరవేర్చడంపై మీ ఉద్దేశాలను “స్పష్టంగా మాట్లాడాలని” తాను ఆశిస్తున్నానన్నారు. ప్రభుత్వాన్ని ఏర్పాటు చేసి నాలుగు నెలలు గడుస్తున్నప్పటికి మీ సూపర్ సిక్స్ వాగ్దానాలు ఇప్పటికీ నెరవేరలేదని షర్మిల గుర్తు చేశారు.

ఏపీ ముఖ్యమంత్రి చంద్రబాబు ప్రతి వారం ఢిల్లీకి పరుగులు తీస్తున్నప్పటికి ప్రధాని మోడీ ఏపీకి ఇచ్చిన హామీల్లో ఒక్కటి కూడా నెరవేర్చకపోవడం సిగ్గుచేటని విమర్శించారు. వైజాగ్ స్టీల్ ప్లాంట్, పోలవరం ప్రాజెక్టులకు అతి గతి లేదన్నారు. వాటి భవిష్యత్తు, పనుల పురోగతిపై కేంద్ర రాష్ట్రల్లోని ఎన్డీఏ కూటమి ప్రభుత్వాలు చెబుతున్న మాటల్లో సందేహాలున్నాయని, దీనిపై నారా లోకేష్ స్పష్టంగా మాట్లాడాలని డిమాండ్ చేశారు.