బీజేపీ ఎంపీ అభ్యర్థి సీఎం రమేశ్‌పై డిప్యూటీ సీఎం సంచలన ఆరోపణలు

దిశ, వెబ్ డెస్క్: అనకాపల్లి బీజేపీ ఎంపీ అభ్యర్థి సీఎం రమేశ్‌పై డిప్యూటీ సీఎం ముత్యాల నాయుడు సంచలన వ్యాఖ్యలు చేశారు. సీఎం రమేశ్ నాటు సారా వ్యాపారం చేశారని.. బ్యాంకులకు కన్నాల వేశారని ఆయన ఆరోపించారు. అంతేకాదు పోర్జరీలు చేసి వేల కోట్లు సంపాదించారని వ్యాఖ్యానించారు. ఆ డబ్బులతో రాజకీయం చేస్తున్నారని మండిపడ్డారు. టీడీపీ అధినేత చంద్రబాబుకు సీఎం రమేశ్ బినామీ అని, రెండు సార్లు రాజ్యసభ సీటు కొనుకున్నారని ముత్యాల నాయుడు గుర్తు చేశారు. అనకాపల్లి బెల్లం దిమ్మలను పార్శిల్ చేసినట్లు.. ఎన్నికల తర్వాత సీఎం రమేశ్‌ను ఇక్కడి నుంచి పంపించేస్తామని హెచ్చరించారు. తాను ఎంపీగా గెలిస్తే అనకాపల్లి రోడ్లపై తిరుగుతానని, అదే సీఎం రమేశ్ గెలిస్తే ఢిల్లీలో తిరుగుతారని డిప్యూటీ సీఎం ముత్యాల నాయుడు చెప్పారు.

కాగా అనకాపల్లిలో వైసీపీ ఎంపీ అభ్యర్థి ముత్యాలనాయుడు ఎన్నికల్లో పోటీ చేస్తున్నారు. ఈ మేరకు ఆయన అనకాపల్లిలో ఎన్నికల ప్రచారం నిర్వహించారు. ఈ సందర్భంగా సీఎం రమేశ్‌పై ముత్యాల నాయుడు సంచలన ఆరోపణలు చేశారు.