CM Chandrababu: మలేషియాలో డ్రైనేజీలో పడి కుప్పం మహిళ గల్లంతు.. ఘనటపై సీఎం ఆరా
దిశ, డైనమిక్ బ్యూరో: మలేషియాలో ఫుట్‌పాత్ కుంగి మురికాలువలో పడి ఏపీకి చెందిన మహిళ గల్లంతైంది. కుప్పం మండలం అనిమిగానిపల్లెకు చెందిన విజయలక్ష్మి అనే మహిళ కౌలాలంపూర్ లో నివాసం ఉంటుంది. ఆమె రోజువారి పనిలో భాగంగా విధులకు వెళ్లి తిరిగి ఓ వీధిలో ఫుట్‌పాత్‌పై నడుచుకుంటూ వస్తున్నది. ఆ సమయంలో ఉన్నట్టుండి ఒక్క సారిగా డ్రైనేజీపై ఉన్న ఫుట్ పాత్ కుంగింది. దీంతో ఆ మహిళ డ్రైనేజీలో పడి కొట్టుకుపోయింది. రెప్పపాటు కాలంలోనే డ్రైనేజీ కుప్పకూలడం మహిళ కొట్టుకుపోవడం జరిగాయి. స్థానికులు వచ్చి చూడగా మహిళ ఆచూకి తెలియలేదు. దీంతో కౌలాలంపూర్ పోలీసులకు సమాచారం అందించారు. దీనికి సంబందించిన సీసీ కెమెరా దృష్యాలు సోషల్ మీడియాలో వైరల్ గా మారాయి. ఘటనపై సమాచారం అందుకున్న సహాయక సిబ్బంది ఘటనా స్థలానికి చేరుకొని గాలింపు చర్యలు చేపట్టారు. ఏపీ ముఖ్యమంత్రి చంద్రబాబు నాయుడు ఘటనపై ఆరా తీశారు. గాలింపు చర్యలు పకడ్బందీగా జరిగేలా చూడాలని ఏపీఎన్ఆర్టీ అధికారులను ఆదేశించారు.
