కేంద్రమంత్రి నితిన్ గడ్కరీతో చంద్రబాబు భేటీ

దిశ, వెబ్ డెస్క్: కేంద్రమంత్రి నితిన్ గడ్కరీతో ఏపీ ముఖ్యమంత్రి చంద్రబాబు నాయుడు భేటీ అయ్యారు. ఆయనతో పాటు కేంద్రమంత్రి రామ్మోహన్ నాయుడు, టీడీపీ ఎంపీలు కూడా ఈ సమావేశానికి హాజరయ్యారు. ఏపీలో నిర్మించాల్సిన జాతీయ రహదారులపై, అన్ని జిల్లాల నుంచి అమరావతికి కనెక్ట్ అయ్యే మార్గాలపై నితిన్ గడ్కరీతో చర్చించారు. అలాగే అమరావతి - హైదరాబాద్ ఎక్స్ ప్రెస్ వే పై కూడా కేంద్రమంత్రి గడ్కరీతో చర్చించి.. త్వరగా వాటి పనులు పూర్తయ్యేలా నిధులు మంజూరు చేయాలని కోరినట్లు తెలుస్తోంది.

సాయంత్రం రైల్వే శాఖమంత్రి పీయూష్ గోయల్, పెట్రోలియం శాఖ మంత్రి హర్దీప్ సింగ్, రాత్రికి హోంమంత్రి అమిత్ షా, ఆర్థిక శాఖ మంత్రి నిర్మలా సీతారామన్ లతో విరివిగా భేటీ అయ్యి రాష్ట్రానికి ఆయా శాఖల నుంచి కావలసిన సహాయాన్ని కోరనున్నారు. బడ్జెట్లో పారిశ్రామిక కారిడార్ల అభివృద్ధి కోసం చేసిన ప్రకటనపై చర్చించనున్నారు.

నిన్న ప్రధాని నరేంద్రమోదీతో భేటీ అయిన సీఎం చంద్రబాబు.. రాష్ట్రానికి శుభవార్త చెప్పారు. పోలవరం నిర్మాణానికి కేంద్రం మరో రూ.2800 కోట్లు మంజూరు చేసి.. అడ్వాన్స్ గా రూ.2000 కోట్లు ఇచ్చినట్లు టీడీపీ ఎక్స్ వేదికగా వెల్లడించింది. ఇప్పటికే రూ.30,436 కోట్ల డీపీఆర్ కు ఆమోదం తెలిపిన కేంద్రం.. మరిన్ని నిధులు మంజూరు చేయడంపై కూటమి ప్రభుత్వం హర్షం వ్యక్తం చేసింది.