అయ్యప్పలు ప్రయాణిస్తున్న వ్యాను బోల్తా.. ఒకరు స్పాట్ డెడ్
దిశ, అనంతపురం: శబరిమల అయ్యప్ప దర్శణానికి వెళ్లి తిరిగి వస్తుండగా వ్యాను బోల్తా పడి ఒకరు మృతిచెందగా.. ఇద్దరికి తీవ్ర గాయాలు అయ్యాయి. ఈ ఘటన తమిళనాడులోని దిండిగల్ జిల్లా వేద సంధూర్ వద్ద మంగళవారం తెల్లవారుజామున రెండు గంటల సమయంలో చోటుచేసుకుంది. వివరాల్లోకి వెళితే.. సత్యసాయి జిల్లా కదిరి మండలంలోని చౌటు తాండకు చెందిన ఎం.శ్రీరాములు నాయక్(50) అయ్యప్ప మాల ధరించాడు. ఇటీవల శబరిమల వెళ్లి వ్యానులో సోమవారం తిరుగు పయణమయ్యారు. ఈ క్రమంలో అయ్యప్ప స్వాములు ప్రయాణిస్తోన్న వ్యాను డివైడర్‌ను ఢీకొని పల్టీలు కొట్టింది. ఈ ప్రమాదంలో తీవ్రంగా గాయపడ్డ శ్రీరాములు నాయక్ అక్కడికక్కడే దుర్మరణం చెందగా, మరో ఇద్దరికి స్వాములకు తీవ్ర గాయాలు అయ్యాయి. డ్రైవర్ నిద్ర మత్తు వల్ల ప్రమాదం జరిగినట్లు తెలుస్తోంది. విషయం తెలుసుకున్న కుంబూర్ పోలీసులు హుటాహుటిన అక్కడికి చేరుకొని క్షతగాత్రులను ఆసుపత్రికి తరలించారు. అనంతరం కేసు నమోదు చేసుకొని దర్యాప్తు ప్రారంభించారు.
