జ్యోతిష్యుడు చెబితే కేసీఆర్ ​ముందస్తు ఎన్నికలకు వెళ్లొచ్చు: మురళీధర్​రావు

దిశ, తెలంగాణ బ్యూరో : మంత్రి కేటీఆర్​ను కేసీఆర్​ముఖ్యమంత్రి గా చేయడని బీజేపీ జాతీయ నేత మురళీధర్​రావు మీడియా చిట్​చాట్ లో సంచలన వ్యాఖ్యలు చేశారు. నాంపల్లి బీజేపీ రాష్ట్ర కార్యాలయంలో సోమవారం నిర్వహించిన ప్రెస్ మీట్​అనంతరం ఆయన చిట్​చాట్​లో పలు అంశాలను వెల్లడించారు. జాతీయ రాజకీయాల్లో తిరగడానికి కేసీఆర్ కు సీఎం పదవి అవసరమని, అందుకే కేటీఆర్​ కు ఆ బాధ్యతలు అప్పగించడని ఆయన పేర్కొన్నారు. సీఎం కేసీఆర్ జ్యోతిష్యుడు చెబితే ముందస్తుకు వెళ్లే అవకాశాలు ఉండొచ్చని ఎద్దేవా చేశారు. ఢిల్లీకి, తెలంగాణకు మధ్య బీజేపీ నేతల్లో ఎలాంటి గ్యాప్ లేదని, ఢిల్లీ - పశ్చిమ బెంగాల్ తరహాలో ఢిల్లీ-తెలంగాణ మధ్య వార్ క్రియేట్ చేయాలని కేసీఆర్ చూస్తున్నారని, అది అసాధ్యమని మురళీధర్​రావు తెలిపారు.

అదే ఆంధ్రప్రదేశ్​లో బీజేపీ.. టీడీపీతో పొత్తు పెట్టుకుంటే తెలంగాణ ప్రజలు బీజేపీని ఆదరించే అవకాశాలు తక్కువగా ఉంటాయని, దానివల్ల తెలంగాణ-ఏపీ మధ్య గ్యాప్ ఉండే అవకాశాలున్నట్లు వెల్లడించారు. నిరుద్యోగ నోటిఫికేషన్ల భర్తీకి ఏడాది సమయం పట్టే అవకాశమున్న నేపథ్యంలో అప్పటి వరకు ఖాళీలు భర్తీ చేస్తే కొంత వ్యతిరేకత తగ్గించుకోవచ్చని టీఆర్ఎస్ ​భావిస్తోందన్నారు. కాశ్మీర్ ఫైల్స్ సినిమా ఇండస్ట్రీలో బాహుబలి లాంటి రికార్డ్స్ ను బ్రేక్ చేస్తుందని ధీమా వ్యక్తం చేశారు. ప్రాంతీయ భాషల్లో కాశ్మీర్ ఫైల్స్ సినిమా రాబోతోందని మురళీధర్​రావు చెప్పారు. వచ్చే ఎన్నికల్లో మాత్రం కచ్చితంగా తాను పోటీ చేస్తానని, అయితే అది ఎంపీ స్థానమా? ఎమ్మెల్యే స్థానమా అనేది ఇప్పుడే చెప్పలేనని పేర్కొన్నారు.