మహిళలు అన్ని రంగాలలో ఎదిగినప్పుడే ఆర్థిక స్వాలంబన సాధ్యం: గువ్వల బాలరాజు

దిశ, అచ్చంపేట: మహిళలు అన్ని రంగాలలో ఎదిగినప్పుడే ఆర్థిక స్వాలంబన సాధ్యపడుతుందని ప్రభుత్వ విప్ ఎమ్మెల్యే గువ్వల బాలరాజు అన్నారు. గురువారం ప్రపంచ మహిళా దినోత్సవం సందర్భంగా అచ్చంపేట పట్టణంలో జిబిఆర్ చారిటబుల్ ట్రస్ట్ చైర్మన్ గువ్వల అమల అధ్యక్షతన ఒక ఫంక్షన్ హాల్లో మహిళా సాధికారికత సాధించడం కోసం కావలసిన వనరులను ఎలా ఉపయోగించుకోవాలో అవగాహన కల్పించే కార్యక్రమాన్ని ఏర్పాటు చేశారు. ఈ సమావేశానికి ముఖ్య అతిథిగా హాజరైన విప్ మాట్లాడుతూ ఈ ప్రభుత్వం గతంలో ఎన్నడూ లేనివిధంగా మహిళల అభివృద్ధి కోసం అనేక విధాలుగా కృషి చేస్తుందని గుర్తు చేశారు. మహిళలు మరింత ఆర్థికంగా ఎదగాల్సిన అవసరం ఉందని, ఉన్న అవకాశాలను సద్వినియోగం చేసుకునేలా ప్రణాళికలు ఉండాలని, జిబిఆర్ చారిటబుల్ ట్రస్ట్ ద్వారా మహిళలకు అన్ని రంగాలలో రాణించేలా సహకారం అందిస్తుందన్నారు. ఈ సందర్భంగా మహిళలకు శుభాకాంక్షలు తెలిపారు. అంతకుముందు పట్టణంలోని ప్రతి కళాశాలలో విద్యార్థులను ఉద్దేశించి మాట్లాడుతూ పురుషులతో సమానంగా విద్యార్థినీలు అన్ని రంగాలలో రాణించాలని సూచించారు. ఈ కార్యక్రమంలో మున్సిపల్ చైర్మన్ నరసింహ గౌడ్, నియోజకవర్గ నలుమూలల నుండి మహిళ ప్రజా ప్రతినిధులు, ఇతరులు పాల్గొన్నారు.