రాజన్న భక్తులకు తప్పనున్న తిప్పలు.. తిరుమల తరహాలో వీఐపీ బ్రేక్ దర్శనం

దిశ,రాజన్న సిరిసిల్ల ప్రతినిధి,వేములవాడ : సాధారణ భక్తులకు దర్శనం ఇబ్బందులు దూరం చేసేందుకు తిరుమల తరహాలో వీఐపీ బ్రేక్ దర్శనానికి ఏర్పాట్లు చేయాలని ప్రభుత్వ విప్, వేములవాడ ఎమ్మెల్యే ఆది శ్రీనివాస్ అధికారులకు సూచించారు. వీఐపీ బ్రేక్ దర్శనం కోసం ప్రత్యేక క్యూ లైన్ ఏర్పాటు చేసి ప్రతి రోజూ ఉదయం, సాయంత్రం గంట చొప్పున విఐపిలకు బ్రేక్ దర్శనానికి అవకాశం ఇవ్వాలన్నారు. వీఐపీ బ్రేక్ దర్శనానికి సాధ్యాసాధ్యాలపై క్షేత్ర అధ్యయనం చేయాలన్నారు. వీలైతే శివరాత్రి జాతరలోగానే బ్రేక్ దర్శనానికి ఏర్పాట్లు చేయాలన్నారు. ఆధ్యాత్మికత ఉట్టిపడేలా, భక్తిభావం ఉట్టిపడేలా మహా శివరాత్రికి న్యూ గ్రాండ్ లుక్ తలపించేలా, భక్తులు మెచ్చేలా ఏర్పాట్లు ఉండాలన్నారు. భక్తుల కోసం తెల్లని వస్త్రం తో కూడిన చలువ పందిళ్ళు వేయాలని ఆలయ అధికారులకు సూచించారు.

మంగళవారం మహాశివరాత్రి జాతరను పురస్కరించుకుని శ్రీ రాజరాజేశ్వర స్వామి దేవస్థానం ఓపెన్ స్లాబ్ లో కలెక్టర్ అనురాగ్ జయంతి అధ్యక్షతన సమన్వయ కమిటీ సమావేశం నిర్వహించారు. సమావేశంలో జిల్లా ప్రజా పరిషత్ చైర్ పర్సన్ న్యాలకొండ అరుణ రాఘవరెడ్డి, ఎస్పీ అఖిల్ మహాజన్, అదనపు కలెక్టర్ పూజారి గౌతమి, మున్సిపల్ చైర్ పర్సన్ రామతీర్థపు మాధవి, ట్రైనీ ఎస్పీ రాహుల్ రెడ్డి, ఆలయ ఈఓ కృష్ణ ప్రసాద్, వేములవాడ ఆర్డీఓ మధు సూదన్ , డీఎస్పీ నాగేంద్ర చారి, ప్రభుత్వ శాఖల జిల్లా అధికారులు, ఆలయ సిబ్బంది తదితరులు పాల్గొన్నారు. ముఖ్య అతిథిగా హాజరైన ప్రభుత్వ విప్, వేములవాడ ఎమ్మెల్యే ఆది శ్రీనివాస్ మహాశివరాత్రి సజావుగా నిర్వహించేందుకు ప్రభుత్వ శాఖల అధికారులకు దిశా నిర్దేశం చేశారు. వేములవాడ శ్రీ రాజరాజేశ్వర స్వామి ఆలయ విశిష్టత, ప్రాధాన్యత పెరగడం వల్ల ఆలయం కు వచ్చే భక్తుల సంఖ్య అంతకంతకూ పెరిగిపోతోందన్నారు.

మహాశివరాత్రి జాతరను రాష్ట్ర పండుగగా భావించి భక్తులు సులభంగా, వేగంగా దర్శనం చేసుకునేలా ఏర్పాట్లు చేయాలన్నారు. శివ స్వాములు, పుర ప్రముఖులు, పాత్రికేయులకు సులభ దర్శనం జరిగేలా ఏర్పాట్లు చేయాలన్నారు. దర్శన సమయం కూడా అరగంట అదనంగా పెంచాలన్నారు. పురం ప్రముఖులకు గతంలో మాదిరి బ్యాడ్జీలు అందజేసి సులభ దర్శనం చేసుకునేలా ఏర్పాట్లు చేయాలన్నారు. ప్రస్తుతం భక్తుల కోసం రెండు క్యూ లైన్ ల సిస్టం ఉన్న దృష్ట్యా విఐపిల కోసం మూడో క్యూ లైన్ శివరాత్రి లోగా ఏర్పాటు చేయాలని చెప్పారు. బద్ది పోచమ్మ ఆలయం వద్ద కూడా భక్తులకు త్రాగునీరు, కూర్చునేందుకు కుర్చీలను , పందిల్ల సౌకర్యం కల్పించాలని చెప్పారు. ఆర్టీసీ బస్సుల్లో మహిళలకు ఉచిత ప్రయాణంతో భక్తుల రద్దీ పెరిగే అవకాశం ఉన్న దృష్ట్యా భక్తులకు ఎటువంటి అసౌకర్యాలు కలగకుండా ప్రత్యేక బస్సులను పెంచి నడిపించాలన్నారు. భక్తులుకు బస్టాండ్ లో మూత్రశాలలు, తాగు నీరుకు ఎలాంటి ఇబ్బంది కలగకుండా చూడాలన్నారు. కంట్రోల్ రూమ్ ల వద్ద ప్రజా సమాచార వ్యవస్థను ఏర్పాటు చేసి మైకు ద్వారా భక్తులకు తెలియజేసే సౌకర్యం కల్పించాలన్నారు.

పారిశుద్ధ్య పనుల నిర్వహణ..

జిల్లా కలెక్టర్ సూచించినట్లు గతంలో జోన్ ల స్థానంలో మానిటరింగ్ పెంచేందుకు పిన్ పాయింట్ లొకేషన్ లుగా విభజించి ప్రతీ పాయింట్ లో ఒక పారిశుద్ధ్య సిబ్బందిని నియమించాలన్నారు. ఒక యూనిట్ చొప్పున తీసుకొని దానికి ఒక ఇంచార్జి నియమించి, దాని నిర్వహణపై పర్యవేక్షణ ఉంచాలన్నారు. నిఘా నేత్రాలతో జాతరలో ఎలాంటి అవాంఛనీయ సంఘటనలు జరగకుండా చూసేందుకు శాశ్వత సీసీ కెమెరా లను పెట్టాలన్నారు. భక్తులకు సరిపడా సురక్షిత తాగు నీరు సరఫరా చేయాలన్నారు. భక్తులకు క్యూ లైన్ లో మంచి నీరు సరఫరా చేయాలన్నారు. చిరు వ్యాపారులకు ఎలాంటి ఇబ్బందులు కలగకుండా ముందస్తుగా వారితో చర్చించాలన్నారు. జాతర విజయవంతంకు సంబంధిత ప్రభుత్వ శాఖల అధికారులు సూక్ష్మ స్థాయి ప్రణాళికలు రూపొందించాలన్నారు.

అన్ని శాఖల అధికారులు సమన్వయంతో సౌకర్యాలు కల్పించాలి : కలెక్టర్ అనురాగ్ జయంతి

మహా శివరాత్రి జాతరకు వచ్చే భక్తులకు అన్ని శాఖల అధికారులు సమన్వయంతో సౌకర్యాలు కల్పించాలని ఛైర్మన్, కలెక్టర్ అనురాగ్ జయంతి ఆదేశించారు. వేములవాడ తిప్పాపూర్ బస్టాండ్ నుంచి శ్రీ రాజరాజేశ్వర స్వామి ఆలయం దాకా, వేములవాడను కనెక్ట్ చేసే అన్ని అప్రోచ్ రోడ్లను , పట్టణ అంతర్గత రోడ్ల మరమ్మత్తు పనులను నెలాఖరులోగా పూర్తి చేయాలని ఆర్ అండ్ బీ అధికారులను ఆదేశించారు. ఆలయ వసతి గదుల్లో ఏమైనా ఇబ్బందులు ఉంటే ఇప్పుడే పరిష్కరించాలని ఈఓ కృష్ణ ప్రసాద్ కు సూచించారు. వేములవాడ మున్సిపల్, ఆలయ అధికారులు సంయుక్తంగా పారిశుధ్య పనులు చేయించాలని, ఎక్కడా ఇబ్బంది రాకూడదని కలెక్టర్ స్పష్టం చేశారు. 'మే ఐ హెల్ప్ యూ' కేంద్రాలు ఏర్పాటు చేయాలని, దానిలో పనిచేసే సిబ్బంది వద్ద ఆలయానికి సంబందించిన పూర్తి సమాచారం, అందరి ఫోన్ నంబర్ లు ఉండాలని తెలిపారు.

ట్రాఫిక్ కు ఇబ్బందులు కలుగకుండా చర్యలు తీసుకుంటాం : ఎస్పీ అఖిల్ మహాజన్

మహా శివరాత్రి సందర్బంగా ట్రాఫిక్ కు ఇబ్బందులు కలుగకుండా చర్యలు తీసుకుంటామని అన్నారు. వేములవాడలో కావాల్సిన సైన్ బోర్డ్, టోయింగ్ వాహనం, క్రేన్ అందుబాటులో ఉంచాలని ఆలయ ఈవోకు సూచించారు. ట్రాఫిక్ ఇబ్బందులు రాకుండా వాలంటీర్ లను తమకు అప్పగించాలని వివరించారు. హోటల్, లాడ్జ్ ల నిర్వహకులను వచ్చే సమావేశానికి రావాలని సూచించారు. ఆలయం అధ్వర్యంలో సీసీ కెమెరాలు ఏర్పాటు చేయాలన్నారు. అగ్ని మాపక అధికారులు ఆలయ సిబ్బందికి అగ్ని మాపక పరికరాలు వాడే విధానంపై ముందస్తు అవగాహన కల్పించాలని తెలిపారు. అనంతరం ప్రభుత్వ విప్, వేములవాడ ఎమ్మెల్యే ఆది శ్రీనివాస్, కలెక్టర్ అనురాగ్ జయంతి, ఎస్పి అఖిల్ మహాజన్, ఆలయ అధికారులతో కలిసి భక్తులకు సులభంగా, వేగంగా సులభ దర్శనం అయ్యేలా చూసేందుకు మూడో క్యూ లైన్ ఏర్పాటు పై ఆలయం వెలుపలి, ఆలయ బయట పరిసరాలను క్షేత్ర స్థాయిలో పరిశీలించారు.