Congress: గ్రాడ్యుయేట్ ఎమ్మెల్సీ ఎన్నికలపై కాంగ్రెస్ ఫోకస్.. మరోసారి ఆయనకే టికెట్!

దిశ, తెలంగాణ బ్యూరో/డైనమిక్ బ్యూరో: వచ్చే ఏడాది జరగబోయే ఎమ్మెల్సీ ఎన్నికలపై అధికార కాంగ్రెస్ (Congress) పార్టీ ఫోకస్ పెట్టింది. ఆదిలాబాద్- నిజామాబాద్- మెదక్- కరీంనగర్ ఉమ్మడి జిల్లాల గ్రాడ్యుయేట్ ఎమ్మెల్సీ ఎన్నిక (Graduate MLC Election)పై కసరత్తు మొదలు పెట్టింది. ఈ మేరకు గురువారం గాంధీ భవన్ (Gandhi Bhavan) లో పీసీసీ చీఫ్ మహేశ్ కుమార్ (Mahesh Kumar Goud) అధ్యక్షతన గ్రాడ్యుయేట్ ఎమ్మెల్సీ ఎన్నికపై కీలక సమావేశం జరిగింది. ఈ మీటిగ్ కు ఏఐసీసీ ఇన్ చార్జి ప్రధాన కార్యదర్శి దీపాదాస్ మున్షీ ముక్య అతిథిగా హాజరయ్యారు. అలాగే మంత్రులు ఉత్తమ్ కుమార్ రెడ్డి, శ్రీధర్ బాబు, కొండా సురేఖ, నాలుగు జిల్లాల ఎమ్మెల్యేలు, డీసీసీ అధ్యక్షులు, ఎమ్మెల్సీలు తదితర హాజరయ్యారు. ఆదిలాబాద్- నిజామాబాద్- మెదక్- కరీంనగర్ పట్టభద్రుల ఎమ్మెల్సీ స్థానం పదవీ కాలం రాబోయే మార్చిలో ముగియబోతున్నది. ప్రతిపక్షంలో ఉండగా జయ కేతనం ఎగురవేసిన ఈ స్థానాన్ని అధికార పక్షం హోదాలో ఎలాగైనా తమ ఖాతాలోనే వేసుకునేందుకు కాంగ్రెస్ వ్యూహాలు రచిస్తోంది. ఇందులో భాగాంగా అనుసరించాల్సిన వ్యూహాలపై ఇవాళ్టి భేటీలో నేతలు చర్చించారు. జిల్లాకు ఓ ఇన్ చార్జిని నియమించాలని నిర్ణయించినట్లు సమాచారం. అలాగే ఓటర్ల నమోదు గడువు తేదీని వచ్చే నెల 9 వరకూ పొడిగించిన నేపథ్యంలో తమ అనుచరులతో క్షేత్రస్థాయిలో పర్యవేక్షించాలని ఎమ్మెల్యేలకు పీసీసీ సూచించింది.

జీవన్ రెడ్డికి మరోసారి ఛాన్స్:షబ్బీర్ అలీ

ఈ భేటీ అనంతరం గాంధీ భవన్ లో మంత్రులు కొండా సురేఖ, సీతక్క,ఎమ్మెల్సీ జీవన్ రెడ్డి తో కలిసి ప్రభుత్వ సలహాదారు షబ్బీర్ అలీ (Shabbir Ali) మీడియాతో మాట్లాడుతూ ఆదిలాబాద్- నిజామాబాద్- మెదక్- కరీంనగర్ పట్టాభద్రుల ఎమ్మెల్సీ ఎన్నికల్లో జీవన్ రెడ్డిని నిలబెట్టాలని ఈ సమావేశంలో తీర్మానం చేశామని చెప్పారు. అయితే అభ్యర్థి ఎంపిక విషయంలో పార్టీ హైకమాండ్ నిర్ణయం తీసుకుంటుందని చెప్పారు. వీలైనంత ఎక్కువ మంది గ్రాడ్యుయేట్ ఓటర్లుగా ఎన్ రోల్ చేయించాలని నిర్ణయం తీసుకున్నట్లు వెల్లడించారు.

త్వరలో అభ్యర్థిపై నిర్ణయం:జీవన్ రెడ్డి

పట్టభద్రుల అభ్యర్థి ఎంపిక వ్యూహాలను సమావేశంలో చర్చించినట్లు ఎమ్మెల్సీ జీవన్ రెడ్డి (Jeevan Reddy) చెప్పారు. 42 శాసనసభ నియోజకవర్గ పరిధిలోని ముఖ్య నాయకులతో ఈ సమావేశం జరిగిందని తెలిపారు. మళ్ళీ గ్రాడ్యుయేట్ స్థానాన్ని ఏ విధంగా నిలబెట్టుకోవాలనే విషయంపై కసరత్తు చేశామని పార్టీ నన్ను కూడా సంప్రదించిందని వెల్లడించారు. త్వరలో అభ్యర్థిపై నిర్ణయం ఉంటుందని చెప్పారు. పది నెల్లోనే 53 వేల ఉద్యోగాలు కాంగ్రెస్ ప్రభుత్వం ఇచ్చి నిరుద్యోగులకు అండగా నిలిచిందని గుర్తు చేశారు.