పాల్వాయి హరీష్ బాబుని అరెస్టు చేసిన పోలీసులు..

దిశ, కాగజ్ నగర్ : కాగజ్ నగర్ మున్సిపాలిటీ కార్యాలయం ఎదుట తలపెట్టిన ధర్నాను పోలీసులు అడ్డుకొని సిర్పూర్ బీజేపీ నాయకుడు డాక్టర్ పాల్వాయి హరీష్ బాబును సోమవారం మున్సిపల్ కార్యాలయం ఎదుట పోలీసులు అరెస్టు చేశారు. పట్టణంలోని మున్సిపాలిటీలో డబుల్ బెడ్ రూమ్ ఇళ్లకు దరఖాస్తులు చేసుకున్న అర్హులైన లబ్ధిదారులకు తెలియకుండా అధికారులు లక్కీ డ్రా తీసి అనర్హులకు డబుల్ బెడ్ రూమ్ ఇండ్లను కేటాయించారంటూ గతవారం రోజుల నుండి పెద్ద ఎత్తున రెవెన్యూ కార్యాలయం ఎదుట ధర్నా కార్యక్రమాలు చేపట్టారు.

ఈ నేపథ్యంలో భారతీయ జనతా పార్టీ ఆధ్వర్యంలో బీజేపీ నాయకుడు పాల్వాయి హరీష్ బాబు చేపట్టిన ధర్నా కార్యక్రమాన్ని పోలీసులు భగ్నం చేసి అరెస్టు చేశారు. మున్సిపల్ కార్యాలయం ఎదుట పెద్దఎత్తున పోలీసులు మోహరించి బీజేపీ నాయకులను చదరగొట్టి పోలీస్ స్టేషన్ కు తరలించారు. రెండు గంటలపాటు కార్యాలయం ఎదుట ఉత్కంఠ నెలకొంది. డీఎస్పీ కరుణాకర్ ఆధ్వర్యంలో పెద్ద ఎత్తున పోలీసులు మోహరించి ఎలాంటి సంఘటనలు జరగకుండా భారీ బందోబస్తు నిర్వహించారు. కార్యాలయం ఆవరణలో ఎవరు రాకుండా పోలీసులు మోహరించారు.