బీజేపీ టికెట్ల కోసం దరఖాస్తుల వెల్లువ.. మూడో రోజు ఊహించని రేంజ్‌లో అప్లికేషన్స్..!

దిశ, తెలంగాణ బ్యూరో: అభ్యర్థుల ఎంపికకు బీజేపీ దరఖాస్తుల ప్రక్రియకు శ్రీకారం చుట్టింది. ఈనెల 4వ తేదీన ఈ ప్రక్రియ ప్రారంభమైంది. కాగా ఒక్క బుధవారం రోజే భారీగా దరఖాస్తులు వచ్చాయి. మూడో రోజు 306 అప్లికేషన్లు రావడం గమనార్హం. తొలి రోజు 63 మంది ఆశావహులు 182 అప్లికేషన్లు సమర్పించారు. రెండో రోజు 178 దరఖాస్తులు వచ్చాయి. మూడో రోజు 306 అప్లికేషన్లు వచ్చాయి. మూడ్రోజుల్లో మొత్తం 666 దరఖాస్తులు వచ్చాయి.

రెండ్రోజులతో పోల్చుకుంటే.. మూడో రోజు ఆశావహులు భారీగా దరఖాస్తులు చేసుకున్నారు. కాగా అప్లికేషన్లకు మరో నాలుగు రోజులు మాత్రమే మిగిలుంది. ఇదిలాఉండగా మూడోరోజు గోషామహల్ టికెట్ కోసం విక్రమ్ గౌడ్, మహేశ్వరం నియోజకవర్గానికి అందెల శ్రీరాములు, ఖైరతాబాద్ సెగ్మెంట్‌కు ఎన్వీ సుభాష్, ఎల్బీనగర్‌కు కొప్పెర శ్యామల, ఉప్పల్‌కు శిల్పా రెడ్డి, గజ్వేల్‌కు కప్పర ప్రసాద్ దరఖాస్తు చేసుకున్నారు. గజ్వేల్ నుంచి పోటీకి ఓయూ విద్యార్థి నేత సురేష్ యాదవ్ సైతం దరఖాస్తు చేసుకోవడం గమనార్హం.