పోసాని కృష్ణమురళి మిస్సింగ్.. అదే కారణమా ?

దిశ, వెబ్‌డెస్క్ : వైసీపీ ప్రభుత్వంపై జనసేనాని అధినేత పవన్ కళ్యాణ్‌విమర్శలు గుప్పించినప్పటి నుంచి వైసీపీ నేతలకు, పవన్ కళ్యాణ్‌కు మధ్య మాటల యుద్ధం జరుగుతోంది. ఈ వ్యవహారంలోకి పోసాని కృష్ణమురళి ఎంటరై పవన్‌పై సంచలన వ్యాఖ్యలు చేయడంతో పోసానిపై పవన్ ఫ్యాన్స్, జనసేననాయకులు తీవ్రంగా మండి పడ్డారు. అంతే కాకుండా ఒక సారి పోసానిపై దాడికి యత్నించగా పోలీసుల సహాయంతో తప్పించుకున్నాడు. ఇక రెండు రోజుల క్రితం పోసాని ఇంటిపై రాళ్లతో దాడి చేశారు. అయితే ఇలా ఏదో విధంగా పోసానిపై దాడులు జరుగుతుండటంతో పోసాని ఎవరికి టచ్‌లో లేకుండా పోయినట్టు ఇండస్ట్రీలో గుసగుసలు వినిపిస్తున్నాయి.

కొన్ని రోజులు పోసాని అందరికి దూరంగా ఉండాలని నిర్ణయించుకున్నట్టు తెలుస్తుంది. ఆయనపై దాడులు జరుగుతున్న నేపథ్యంలో ఆ వివాదం సమసిపోయే వరకు తాను అజ్ఞాతంలో ఉంటారేమోనని మరికొందరు చర్చించుకుంటున్నారు. ఎవరికి కనబడకుండా పోవడంతో.. పోసాని తీరుపై నిర్మాతలు మండిపడుతున్నారు. పోసాని తన కాంబినేషన్‌లో ఉన్న సినిమా షూటింగ్స్‌కి హాజరు కావడం లేదని.. కనీసం తాను ఎక్కడ ఉన్నారు అనే సమాచారం ఇవ్వడం లేదంటూ ఫైర్ అవుతున్నారు. కనీసం ఫోన్ చేస్తే కూడా స్పందిచడం లేదంటూ ఆగ్రహం వ్యక్తం చేశారు.