మంత్రి గంగులకు నాంపల్లి కోర్టు గుడ్‌న్యూస్.. ఆ కేసు కొట్టివేత

దిశ, కరీంనగర్ సిటీ : ఎన్నికల కోడ్ ఉల్లంఘన కేసులో మంత్రి గంగుల కమలాకర్‌కు ఊరట లభించింది. 2018 అసెంబ్లీ ఎన్నికల సమయంలో నాటి కరీంనగర్ నియోజకవర్గ టీఆర్‌ఎస్ అభ్యర్థిగా పోటీ చేసిన మంత్రి గంగుల ఎన్నికల కోడ్ ఉల్లంగించారంటూ కేసు నమోదైంది. ఈ కేసు శుక్రవారం నాంపల్లి ప్రజా ప్రతినిధుల కోర్టులో హియరింగ్‌కు వచ్చింది. ఆయనతో పాటు మరికొందరిపై చేసిన అభియోగాలకు సంబంధించిన ఆధారాలు సమర్పించకపోవటంతో కేసు కొట్టివేసినట్టు గంగుల తరఫున వాదనలు వినిపించిన అడ్వొకేట్ రాజేందర్ రావు తెలిపారు.

కేసు నెంబర్ 37/20లో ఏ1గా మంత్రి గంగుల వరుసగా టీఆర్ఎస్ నాయకులు చల్లా హరిశంకర్, చంద్రశేఖర్, కర్ర సూర్యశేఖర్, బట్టు వరప్రసాద్, పెద్దిరమేష్‌లపై అభియోగాలు నమోదవ్వగా, కేసు నెంబర్ 38/20లో మంత్రి గంగుల ఏ1, ఏ2గా చల్లా హరిశంకర్‌లపై కోడ్ అమల్లో ఉండగా అధికారిక కార్యక్రమాల్లో కొబ్బరికాయ కొట్టారని ప్రభుత్వం కేసు నమోదు చేసింది. అయితే, ఈ అభియోగాలను విచారించిన నాంపల్లి ఎంఎల్ఏ, ఎంపీల కోర్టు, ప్రాసిక్యూషన్ అభియోగాలను నిరూపించలేకపోవడంతో మంత్రి గంగులతో సహా మిగతా వారందరిపై కేసులను కొట్టివేసి నిర్దోషులుగా తీర్పు వెలువరించినట్టు శుక్రవారం విడుదల చేసిన ప్రకటనలో న్యాయవాది రాజేందర్ రావు తెలిపారు.