టీమ్ ఇండియా కోసం లగ్జరీ హోటల్ సిద్దం

దిశ, స్పోర్ట్స్: యూఏఈ వేదికగా ఐసీసీ పురుషుల టీ20 వరల్డ్ కప్ అక్టోబర్ 17 నుంచి ప్రారంభం కానున్నది. తొలుత ఒమన్ వేదికగా రౌండ్ 1 మ్యాచ్‌లు జరుగనుండగా.. అక్టోబర్ 23 నుంచి సూపర్ 12 మ్యాచ్‌లు నిర్వహించనున్నారు. వరల్డ్ కప్ జరిగే సమయంలో టీమ్ ఇండియా బస చేయడానికి దుబాయ్‌లోని ఒక లగ్జరీ హోటల్‌ను బీసీసీఐ బుక్ చేసినట్లు సమాచారం. దుబాయ్ తీరంలో కృత్రిమంగా నిర్మించిన పామ్ జమేరియా దీవుల్లో ఉన్న ది పామ్ అనే లగ్జరీ హోటల్‌లో టీమ్ ఇండియా బస చేయనున్నది.

భారత జట్టు సహాయక సిబ్బంది అక్టోబర్ 2న ఆ హోటల్‌లో దిగనున్నారు. ప్రస్తుతం ఐపీఎల్‌లోని పలు ఫ్రాంచైజీలకు ప్రాతినిథ్యం వహిస్తున్న టీమ్ ఇండియా వరల్డ్ కప్ జట్టు సభ్యులు ఐపీఎల్ ముగిసిన తర్వాత ది పామ్‌కు చేరుకుంటారని తెలుస్తున్నది. ప్రస్తుతం ఈ హోటల్‌లో చెన్నై సూపర్ కింగ్స్ జట్టు బస చేస్తున్నది. అక్టోబర్ 1న ఐపీఎల్ ఫైనల్ ముగియనుండటంతో తర్వాత రోజు చెన్నై జట్టు హోటల్‌ నుంచి వెళ్లిపోతుంది. ఈ లగ్జరీ హోటల్‌లో ఒక్క సింగిల్ బెడ్‌ ఉన్న గది అద్దె రోజుకు రూ. 40 వేలు ఉంటుందని సమాచారం.