ఈసారి బీజేపీకి అవకాశం ఇవ్వండి : ఎమ్మెల్యే రఘునందన్ రావు

దిశ, సిద్దిపేట: సిద్దిపేటలో టీఆర్ఎస్ తాటాకు చప్పుళ్ళకు బీజేపీ అభ్యర్థులు ఎవరూ భయపడరని, ఎన్ని అడ్డంకులు సృష్టించినా మున్సిపల్ ఎన్నికల్లో బీజేపీ అభ్యర్థుల గెలుపు ఖాయమని దుబ్బాక ఎమ్మెల్యే రఘునందన్ రావు అన్నారు. సిద్దిపేట మున్సిపల్ ఎన్నికల ప్రచారంలో భాగంగా ఆదివారం ఆయన ప్రచారం నిర్వహించారు. ఈ సందర్భంగా రఘునందన్ రావు మాట్లాడుతూ.. సిద్దిపేటలో అభివృద్ధి బూటకం అని కొట్టిపారేశారు. ఓట్ల కోసం మంత్రి హరీష్ రావు, టీఆర్ఎస్ నాయకులు, పోలీసులను వాడుకుంటూ, అధికారులను బెదిరిస్తున్నారని ఆరోపించారు. మెయిన్ రోడ్లలో కొంతమేర అభివృద్ధి జరిగింది తప్ప.. గల్లీల్లో ఎక్కడా ఏం జరుగలేదని అన్నారు. ప్రజల జీవన స్థితిగతులు మెరుగు పడాలంటే గల్లీలు అభివృద్ధి చెందాలన్నారు. ఎన్నికలు వచ్చాయని ఆగమాగం రోడ్లు వేస్తూ నాసిరకం పనులు చేపడుతున్నారని మండిపడ్డారు. ఈసారి బీజేపీకి అవకాశం ఇవ్వాలని రఘునందన్ రావు ప్రజలను కోరారు.