సిరిసిల్లలో దారుణం.. బాలికపై గ్యాంగ్ రేప్

దిశ, సిరిసిల్ల : సిరిసిల్ల జిల్లాలో బాలికపై గ్యాంగ్ రేప్ జరిగిన ఘటన ఆలస్యంగా వెలుగులోకి వచ్చింది. వివరాలిలా.. ఎల్లారెడ్డిపేట మండలంలో ఇంటర్ చదువుతున్న ఓ బాలిక తన తల్లిదండ్రులతో కలిసి మండల కేంద్రంలో నివసిస్తోంది. బాలిక ఇంటి దగ్గరే ఉండే ఓ యువకుడు ఆమెతో స్నేహంగా మెలిగేవాడు. మూడు రోజుల క్రితం ఆమెకు ఫోన్ చేసి తన పుట్టిన రోజు వేడుకలకు రావాలని ఆహ్వానించాడు. అనంతరం ఆ యువకుడు తన ముగ్గురు స్నేహితులతో కలిసి బాలికను ఓ ఇంటికి తీసుకెళ్లాడు. ఇదే క్రమంలో ఆమెకు మత్తుమందు కలిసిన కూల్‌డ్రింక్ ఇచ్చారు. బాలిక అపస్మారక స్థితిలోకి వెళ్లాక ఆమెపై లైంగికదాడికి పాల్పడ్డారు. ఘటనను సెల్‌ఫోన్‌లో రికార్డు చేశారు. విషయం ఎవరికైనా చెబితే ఆ వీడియోను సోషల్ మీడియాలో పెడతామని బెదిరించారు. మూడు రోజుల తర్వాత ఆమెను వదిలిపెట్టారు. విషయం బాలిక తల్లిదండ్రులకు తెలియడంతో వారిని సైతం సదురు యువకులు బెదిరించారు. చివరికి బాధితురాలి పేరెంట్స్ పోలీసులకు ఫిర్యాదు చేయడంతో విషయం వెలుగులోకి వచ్చింది. కేసు దర్యాప్తు చేస్తున్న పోలీసులు నిందితుల కోసం గాలింపు చర్యలు చేపట్టారు.