తాగుడుకు బానిసై.. పసిబిడ్డను అమ్మకానికి పెట్టిన కీచక తండ్రి

దిశ, నాగర్ కర్నూల్: తాగుడుకు బానిసై ఓ తండ్రి తన కన్న కొడుకునే అమ్మకానికి పెట్టాడు. ఈ ఘటన నాగర్ కర్నూల్ జిల్లా కొల్లాపూర్ కేంద్రంలో ఆలస్యంగా వెలుగుచూసింది. వివరాలు…నాగర్ కర్నూలు జిల్లా కొల్లాపూర్ మండలం మొలచింతలపల్లి గ్రామం చెంచుగూడెంకు చెందిన నెలన్నర వయస్సు గల బాలుడిని అమ్ముతున్నట్లు తండ్రి చెంచు బయ్యన్న ముక్కిడిగుండం గ్రామానికి చెందిన నాను బాలయ్య అనే వ్యక్తికి తెలిపాడు. దీంతో కొల్లాపూర్ కు చెందిన వ్యక్తులకు బాలుడిని రెండు లక్షలకు బేరం కుదిర్చాడు. వారి నుండి లక్ష యాభైవేలు రూపాయలు అడ్వాన్స్ గా తీసుకుని బాలుడిని కొన్నవారికి అప్పజెప్పడానికి వెళ్తున్న సమయంలో పోలీసులు ఖచ్చితమైన సమాచారం మేరకు అడ్డుకుని వారిని పోలీసు స్టేషన్ కు తరలించారు. తల్లిదండ్రులకు కౌన్సెలింగ్ ఇచ్చారు. ఈ ఘటన ఆలస్యంగా వెలుగులోకి వచ్చింది. బాలుడి తల్లి మూగ కావడంతో కనీసం తన బాధ వ్యక్తం చేయలేకపోవడం విశేషం.