CMKCR-Eatala Rajender: సంచలనం: టీఆర్​ఎస్​ నుంచి ఈ రాత్రికే ఈటల బహిష్కరణ..?

దిశ, తెలంగాణ బ్యూరో : మాజీ మంత్రి ఈటల రాజేందర్​ను టీఆర్​ఎస్​ నుంచి బహిష్కరించేందుకు రంగం సిద్ధమైంది. పార్టీకి రాజీనామా చేసేందుకు సిద్ధమవుతున్నారన్న ప్రచారం నేపథ్యంలో ముందుగా పార్టీ నుంచి సస్పెండ్​ చేయాలని టీఆర్​ఎస్​ అధిష్టానం భావిస్తోంది. ఇప్పటికే ఈటలపై చర్యలు తీసుకుంటామని ఎమ్మెల్సీ పల్లా రాజేశ్వర్​రెడ్డి రెండు రోజుల కిందటే ప్రకటించారు. అయితే ఢిల్లీకి వెళ్లి నాలుగు రోజుల పాటు పలువురు నేతలతో భేటీ అయిన ఈటల… గురువారం ఉదయం హైదరాబాద్​కు చేరుకున్న విషయం తెలిసిందే. అనంతరం పలువురు నేతలతో దీనిపై చర్చించినట్లు సమాచారం. దీనిలో భాగంగా ముందుగా టీఆర్​ఎస్​కు రాజీనామా చేయాలని ఈటల నిర్ణయం తీసుకున్నారని ఈటల వర్గంలో టాక్​.

రాజీనామా క్రెడిట్​ దక్కకుండా…!

గతంలో టీఆర్​ఎస్​కు రాజీనామా చేసేందుకు ఎవరైనా ప్రయత్నాలు చేస్తున్నారంటే… ముందుగానే వారిని పార్టీ నుంచి బహిష్కరిస్తున్నట్లు ప్రకటన చేశారు. రాములు నాయక్​తో పాటు పలువురు నేతల వ్యవహారంలో ఇదే జరిగింది. ఇప్పుడు ఈటల అంశంలో కూడా అదే నిర్ణయం తీసుకున్నట్లు తెలుస్తోంది. టీఆర్​ఎస్​ పార్టీకి రాజీనామా చేశారనే క్రెడిట్​ను వారికి దక్కకుండా ముందుగానే పార్టీ నుంచి తొలిగించినట్లు ప్రకటిస్తే ఇక ఏ పార్టీలో చేరినా తమకేం సంబంధం అనే రీతిలో టీఆర్​ఎస్​ అధిష్టానం వ్యవహరిస్తోంది.
మరోవైపు ఈటలను పార్టీ నుంచి సస్పెండ్‌ చేయాలని కరీంనగర్ టీఆర్ఎస్‌ నేతలు గతంలోనే తీర్మానం చేశారు. తీర్మానంపై మంత్రులు, ఎమ్మెల్యేలు సంతకం చేశారు. ఈ లేఖపై మంత్రులు గంగుల కమలాకర్, కొప్పుల ఈశ్వర్, ఎమ్మెల్యేలు విద్యాసాగర్ రావు, రసమయి, మాజీ ఎంపీ వినోద్ తదితరులు సంతకాలు కూడా చేసి పార్టీ వర్కింగ్​ ప్రెసిడెంట్​ కేటీఆర్​కు అందించిన విషయం తెలిసిందే. ఈటల రాజేందర్ పార్టీకి వ్యతిరేకంగా మాట్లాడారని ఉమ్మడి కరీంనగర్ నేతలు సీఎం కేసీఆర్‌కు రాసిన లేఖలో పేర్కొన్నారు.

ఇవ్వాళ రాత్రి వరకే ప్రకటన..?

ఈటల రాజేందర్​ను టీఆర్​ఎస్​ నుంచి బహిష్కరిస్తున్నట్లు గురువారం రాత్రి వరకు టీఆర్​ఎస్​ నుంచి అధికారిక ప్రకటన వెలువడే అవకాశాలున్నాయి. బీజేపీలో చేరేందుకు ఈటల దాదాపుగా మొగ్గు చూపుతున్న నేపథ్యంలో టీఆర్​ఎస్​ కూడా కొంత అడ్వాన్స్​గా ఈ నిర్ణయం తీసుకున్నట్లు పార్టీ నేతలు చెప్పుతున్నారు. దీంతో గురువారం రాత్రి వరకే ఆయన్ను పార్టీ నుంచి బహిష్కరిస్తున్నట్లు ప్రకటన రానున్నట్లు పార్టీ నేతల్లో టాక్​. అటు పార్టీ నుంచి సస్పెండ్​ చేస్తే కూడా ఈటల రాజేందర్​ ఏ పార్టీలో చేరే అంశం కూడా పూర్తి క్లారిటీ రానుంది.