చెరువు కాలువలో పడి ఇద్దరు వ్యక్తులు మృతి..

దిశ, నర్సాపూర్ : చెరువు కాలువలో పడి ఇద్దరు వ్యక్తులు మృతి చెందిన సంఘటన నర్సాపూర్ పట్టణంలో మంగళవారం రాత్రి చోటు చేసుకుంది. స్థానికులు తెలిపిన వివరాల ప్రకారం మండల పరిధిలోని కాగజ్ మద్దూర్ గ్రామానికి చెందిన భోగ రాములు (34), నప్పరి నర్సింలు ( 30) నర్సాపూర్ పట్టణానికి వచ్చి తిరుగు ప్రయాణం అయ్యారు. కాగజ్ మద్దూరు వెళ్తున్న క్రమంలో బైక్ అదుపుతప్పి ప్రమాదవశాత్తు స్థానిక రాయారావు చెరువు కట్ట కాలువలో పడిపోయారు.

కాగా అటు వైపు వెళ్తున్న వారు గమనించి పోలీసులకు సమాచారం ఇవ్వడంతో సీఐ జాన్ రెడ్డి, ఎస్ఐ లింగం సంఘటనా స్థలానికి చేరుకునే వరకు అప్పటికే మృతి చెందారు. కుటుంబీకులకు సమాచారం ఇవ్వడంతో వారు ఘటనా స్థలానికి చేరుకున్నారు. కుటుంబీకుల రోదనలతో ఆ ప్రాంతమంతా శోకసముద్రంలో మారింది. పోస్టుమార్టం నిమిత్తం మృతదేహాలను నర్సాపూర్ ప్రభుత్వ ఆసుపత్రికి తరలించారు. కుటుంబసభ్యుల ఫిర్యాదు మేరకు కేసు నమోదు చేసుకుని దర్యాప్తు చేస్తున్నట్లు పోలీసులు తెలిపారు.