ఆర్టీసీ బస్సులో ఉరేసుకొని కండక్టర్ ఆత్మహత్య
మహబూబాబాద్ జిల్లా తొర్రుర్ లో ఓ కండక్టర్ ఆర్టీసీ బస్సులో ఉరి వేసుకొని ఆత్మ‌హ‌త్య‌కు పాల్ప‌డ్డాడు.
దిశ, వ‌రంగ‌ల్ బ్యూరో : ఓ కండక్టర్ ఆర్టీసీ బస్సులో ఉరి వేసుకొని ఆత్మ‌హ‌త్య‌కు పాల్ప‌డిన సంఘ‌ట‌న మహబూబాబాద్ జిల్లా తొర్రుర్ మండల కేంద్రంలోని ఆర్టీసీ డిపోలో జ‌రిగింది. స్థానికులు తెలిపిన వివరాల ప్రకారం.. తొర్రూరు మండలం కంఠాయ‌పాలెం గ్రామానికి చెందిన మహేందర్ రెడ్డి ఆదివారం ఉద‌యం 10 గంటలకు డ్యూటీ ఉందని 11 గంటల ప్రాంతంలో డిపోకు చేరుకున్నాడు. సెక్యూరిటీ కార్యాల‌యం రిజిస్ట్రార్‌లో సంతకం పెట్టి డిపోలోకి వెళ్లాడు. వెళ్లి చాలా సమయమైన తిరిగిరాక‌పోవ‌డంతో సెక్యూరిటీ సిబ్బంది వెళ్లి చూడ‌గా బస్సులో ఉరివేసుకుని ఉన్నాడు.
ఈ ఘ‌ట‌న మ‌ధ్యాహ్నం వెలుగులోకి రాగా డిపో అధికారులు పోలీసుల‌కు సమాచారం అందించారు. మహేందర్ రెడ్డి ఎందుకు ఆత్మహత్య చేసుకున్నాడు? అనే విష‌యం తెలియ‌రాలేదు. ఈ సంఘ‌ట‌న‌పై పోలీసులు కేసు న‌మోదు చేసుకుని ద‌ర్యాప్తు చేస్తున్నారు. ప‌ని ఒత్తిడితోనే ఆత్మ‌హ‌త్య‌కు పాల్ప‌డ్డ‌డా..? వ్య‌క్తిగ‌త కార‌ణాల‌తోనా? ఇంకేమైనా కార‌ణాలున్నాయ‌న్న విషయాలపై పోలీసులు ఆరా తీస్తున్నారు.